GIPALAGPOT ni Sultan Kudarat Police Provincial Director Colonel Christopher Bermudez ang tanang sakop sa Lambayong Sultan Kudarat Municipal police, lakip na ang hepe niini nga si Major Jenahmeel Toñacao.
Kini aron mahatagan og dalan ang walay gidapigan nga imbestigasyon sa kamatayon sa tulo ka mga tin-edyer sa checkpoint operation sa Lambayong Municipal Police Station niadtong Disyembre 2.
Gipamahayag ni Bermudez nga wala gipasagdan sa polisya ang imbestigasyon sa kaso nga nahitabo niadtong Disyembre 2 sa Lambayong.
Samtang gipasalig ni Bermudez sa pamilya sa mga biktima ug sa tanang lumulupyo sa Lambayong nga wala silay dapigan sa imbestigasyon.
Sa pikas bahin, gipatawag sa Sangguniang Bayan sa Lambayong ubos sa pagpangulo ni Bise Mayor Eric Recinto si Major Toñacao alang sa usa ka legislative inquiry sa pagkamatay nila Arshad Ansa, Horton Ansa Jr. ug Samanode Ali.
Apan wala mipatim-aw si Toñacao ug ang iyang mga sakop lang ang mitambong sa SB session.
Nagsugod na sab ang Commission on Human Rights (CHR) sa ilang imbestigasyon sa kamatayon sa tulo ka batan-on.
Kahinumdoman nga giingong milikay ang magbarkada nga sakay sa motorsiklo sa checkpoint hinungdan nga gigukod sa mga pulis.
Naabtan kini sa mga sakop sa alert team sa Lambayong Municipal Police Station ug giingong nanukol ang mga batan-on hinungdan nga nibawos ang mga pulis.
Una nang gipamahayag sa pamilya sa mga napatay nga "rubout" ang nahitabo ug dili "shoutout" gumikan walay mga armas ang magbarkada.