GIPAHIMANGNOAN ang Dabawenyos nga hinay-hinay lang sa pagkaon atol sa kapaskohan aron malikayan ang mga sakit sunod tuig.

Kini ang pasidaan ni Davao City Health Office (CHO) Nutrition Division Head Elizabeth Banzon atol sa paghinabi uban sa City Information Office (CIO) niadtong Lunes, Disyembre 5, 2022.

Gisulti ni Banzon nga Dabawenyos kinahanglan nga mosunod sa "Pinggang Pinoy".

"Among ginaawhag ang tanan, as usual, dili nato kalimtan ang Pinggang Pinoy. Sa isa ka plato enough rice, one cup rice daghanon nato ang gulay two cups, at the same time, naa ta'y isda ug meat," pag-awhag ni Banzon.

Iyang gitambagan ang Dabawenyos nga mopailawom og health check-up aron nga masayran ang ilang gipamati -- kung taas ba ang ilang dugo o dili -- ug kon mohatag og preskripsyon sa medikasyon, kinahanglan nga sundon.

"Kon hypertensive ta, kon gusto mokaon og meat, cube-sized lang gyud para pud dili ta magkaroon og hypertension. Low salt, low meat diet unta ta karong pasko kay ang pauli man gud sa atoang lawas kung dili ta mag-amping," pasidaan niya.

Ang pag-inom sab og alak kinahanglan nga himuon sa hinay-hinay ug ginagmay lang.

Gitambagan sab niya ang mga kabataan nga likayan ang "junk food".

"Ang atoang pangalagaan ang atoang panlawas kay mao man na siya ang tumong ug tinguha no nga mag enjoy ta sa spirit of Christmas. Everybody and the family to be happy," pagtin-aw niya.

Iya sab nga gipahinumdoman ang tanan nga moinom og tubig aron nga malimpyohan ang lawas ug mag-ehersisyo.

Pagklaro niya nga kinahanglan ang tanan mokaon lang o mohurot lang og gamay sa tanan tungod kay ang sobra makamugna og mga sakit. (CIO)