MIDANGOP sa barangay ang usa ka lalaki kinsa giingong gibitsinan sa iyang katagay ang beer nga iyang nainom, atol sa pista sa Immaculate Conception kagahapon sa Katambak Street, Jerome, Agdao District, Davao City.

Sa impormasyon nga nahipos sa Superbalita Davao gikan mismo sa mga namista nga hapit nagubot ang usa ka kalye human nga mimata na ang giingong lalaki nga si alyas Rolly, 45-anyos, traysikad drayber, kinsa nasuko kay kuno gibitsinan siya samtang sila nagtagay alas 9 sa buntag kagahapon.

Nasayran nga alas 11 pa lang sa buntag, wala pa nadeklara ang paniudto sa gipistahan ni Rolly, nahagba na kini ug nakatulog sa daplin.

Alas 2 sa hapon, nakamata ang nasampit nga drayber human nga gipugos kini'g pukaw sa iyang mga higala nga namista pud, kay nakaihi na kini sa iyang pantalon.

Didto perteng sukoa ni Rolly kinsa hubog pa nga namulong nga siya kuno gibitsinan sa iyang mga kaubanan.

Si Rolly kauban sa laing tulo pa ka higala nga taga Barangay 5-A, Bankerohan, Davao City nga namista sa Jerome.

Ang tulo ug ang tagbalay hugot nga milimod sa pasangil, apan ang usa sa ilang mga kaubanan nagbutyag nga wala kuno kapamahaw si Rolly diin gidasdas niini og una ang tagay, maong naigo pag-ayo sa ilimnong makahubog.

Dugang nasayran nga buot kuno ni Rolly nga moreklamo batok sa iyang mga katagay aron nga ipatawag sa barangay.