Mopasaka og ejectment case ang Kagamhanan sa Lalawigan sa Sugbo batok sa Highway Patrol Group (HPG) human sa napakyas nga negosasyon nga pabakwiton sila gikan sa luna nga kasamtangang gigamit niini.
Ang HPG kasamtangang nahiluna sa luna nga gipanag-iya sa Kapitolyo sa Gorordo Avenue, dakbayan sa Sugbo.
Subay sa impormasyon sa Sugbo News, media arm sa Kapitolyo, hangyuon ni Cebu Governor Gwendolyn Garcia ang Hunta Probinsyal nga hatagan siya og katungod nga mopasaka og kaso.
Sa wala pa ang maong desisyon, gikatakda na usab nga i-revoke sa Hunta Probinsyal ang deed of donation nga gilagdaan sa milabayng administrasyon niadtong Agusto 2018.
Sa Disyembre 6, 2022, nakigtigum ang gobernador kauban sila si HPG Regional Director Niel Francia, HPG-Metro Cebu Chief Silvestre Cenia ug ubang kaubanan.
Gitanyag ni Garcia ang 737-square-meter nga luna sa Sudlon, Barangay Lahug nga maoy kabalhinan sa HPG pinaagi sa usufruct agreement. Butang nga wa uyoni sa HPG.
“Naa nay yuta, ako na nang gi-offer. Mas dako pa gyud na. You belong there (in Sudlon), not on a highly commercial, very valuable lot,” matod ni Garcia pinaagi sa Sugbo News.
Gawas sa HPG, gitanyag na usab ni Garcia ang maong luna ngadto sa mga ahensya sama sa Maritime Industry Authority (Marina), Criminal Investigation and Detection Group (CIDG) ug National Food Authority (NFA) isip kabalhinan niini.
Sa pasiunang mga tigom, una nang gipasabot ni Garcia nga depektuso ang deed of donation sanglit wala kini nakakuha og approval gikan sa Commission on Audit (COA) nga gi-require sa balaod.
Matud ni Garcia nga ang donasyon sa highly commercial area nakapaalkansi sa kagamhanan ug sa mga konstituente niini.
Tungod kay atol sa tuig nga gi-donate kini, moabot na sa P135 milyunes ang balor sa 679-square-meter nga luna.
“Irregular gyud ni. Kinsa guy manghatag og yuta nga pwerteng mahala na na. Nya without any compensation whatsoever to the Province of Cebu, nganhi pa gyud sa syudad,” matud ni Garcia. (ANV)