Patay ang usa ka tindera samtang 10 ka mga pasahero ang angol dihang ang bus nga ilang gisakyan gibangga sa drayber sa usa ka bungtod sa lungsod sa Bilar, lalawigan sa Bohol sa Huwebes sa buntag, Disyembre 8, 2022.

Giila ang biktima nga si Erlinda Anob, 69, kinsa padulong sa dakbayan sa Tagbilaran aron mamaligya og panit sa baboy, banana chips ug fish crackers.

Nag-antos siya og daghang bali tungod sa impact sa bangga.

Wala pa makuha sa kapulisan ang ngalan sa 10 nga nasamdan atol ning pagsuwat samtang gidali sa pagdala sa lainlaing mga tambalanan.

Matud ni Staff Sergeant Mark Cabusao, imbestigador sa Bilar Police Station, ang Mountain Eagle Transit bus nga gimaneho ni Joseph Salem Ratilla, 39, bag-o lang nakasulod sa man-made forest sa Barangay Aurora sa maong lungsod dihang nabantayan sa drayber nga wala na mokupot ang brake.

Sa sinugdan, nagpakahilom lang siya tungod kay dili siya gusto nga ma-rattle ang iyang 25 ka mga pasahero, apan sila nakabantay nga wala na mohinay ang bus samtang nag-agi sa liko-liko nga dalan.

Si Ratilla niingon nga wa siyay laing mahimo gawas sa pagpangita og lugar diin ibangga ang bus. Nakit-an niya ang tiilan sa usa ka bungtod nga adunay daghang mga kahoy ug nidiretso siya niini. Ang pikas kilid kay pangpang, matud niya.

Dugang ni Cabusao nga nahitabo ang aksidente, alas 9:30 sa buntag, apan diha na sila nakadawat sa report paglabay na sa tunga sa oras.

Matud ni Cabusao nga ila nang giandam ang kaso batok kang Ratilla nga anaa na sa ilang kustodiya. (BBT)