Wala na makaantos, namatay sud sa pribadong tambalanan sa Miyerkules sa ala 1 pasado sa hapon, Disyembre 7, ang pulis nga gipusil dihang niuwang sa away sa Purok Tambis, Barangay Lawis, lungsod sa San Remigio, amihanang Sugbo.

Si Staff Sergeant Jade Carabuena, 38, residente sa dapit ug niresponde sa kasamok tali sa iyang mga silingan nga nag-away sa disco party sa atbang lang sa iyang balay niadtong Dominggo sa kaadlawon, Disyembre 4, 2022, dihang siya gipusil tumong sa ulo.

Gidala siya sa tambalanan sa dakbayan sa Bogo apan gibalhin sa pribadong tambalanan sa dakbayan sa Sugbo tungod sa iyang kritikal nga kahimtang.

Si Cebu Police Provincial Office (CCPO) Chief Colonel Romel Ochave niingon nga si Carabuena namatay tungod sa traumatic brain injury.

Matud ni Ochave nga ang San Remigio police nipasaka na unta og kaso nga frustrated murder niadtong Miyerkules batok sa mga suspek nga sila si Filmar Jomao-as Menchavez ug iyang igsuon nga si Jonathan ug usa ka ‘John Doe’, kinsa gawasnon pa.

Apan gi-upgrade sa kapulisan ang alarma ug scandal charge ngadto sa frustrated murder nga kaso human gitumbok sa pipila ka mga saksi ang duha maoy ilang nakita nga ningtion og pusil sa likod sa ulo sa biktima.

Ang managsuong Menchavez nasikop sa mirespondeng mga pulis human sa insidente alang sa alarma ug eskandalo nga kaso, samtang ang ikatulo nga suspek nakalikay sa pagkasikop ug gipangita sa kapulisan sa pagkakaron.

Dayon ilang gisaka ang kaso ngadto sa murder human namatay si Carabuena.

Itugyan sa CPPO ang P50,000 nga tabang pinansyal sa pamilya sa biktima, gawas sa mga benepisyo nga madawat ni Carabuena gikan sa organisasyon sa Philippine National Police.

Si Carabuena nakadawat og mga pagdayeg gikan sa mga taas nga opisyal sa kapulisan sa iyang pagtubag sa alarma bisan og wala siya nag-duty.

Gikondenar ni Police Regional Office (PRO) 7 Director Brigadier General Roderick Augustus Alba ang pagkamatay ni Carabuena, nga nag-ingon nga ang mga pulis sa tibuok Central Visayas naguol sa kalit nga pagbiya sa ilang kauban sa serbisyo.

“Saludo mi, grabe ang saludo namo kang Sergeant Carabuena sa paghalad sa iyang kinabuhi sa iyang trabaho isip pulis.. ” matud ni Alba sa Superbalita Cebu.

Dugang ni Alba nga dili siya gusto nga adunay laing nirespondeng pulis nga mapatay. (AYB)