BAYNTE kwatro ka mga suspek nga nalambigit sa e-sabong ang nasikop sa kapulisan sa isla sa Sugbo sukad sa Disyembre 4, 2022.

Nunot kini sa ilang kampanya batok sa e-sabong human nimando ang Camp Crame sa pagsumpo sa online sabong sa tibuok nasod human kini gisuspenso ni kanhi Presidente Rodrigo Duterte human nahanaw ang 34 ka mga tawo sa kaulohan.

Niadtong Martes, Disyembre 6, 2022, nasikop sa mga operatiba sa Provincial Intelligence Unit sa CPPO ug Criminal Investigation and Detection Group (CIDG) ang tulo ka mga tawo nga giingong nalambigit e-sabong gawas sa cockpit arena sa Bugho, bukirang barangay sa habagatang lungsod sa San Fernando.

Giila ang mga suspek nga sila si Dulce Arañas, Joselito Baritos Pongase ug Alberto Casamiro Rosquetes, pulos mga residente sa maong dapit.

Gawas sa 17 ka fighting cocks, nakuha usab nila ang upat ka mga monitor, usa ka CPU (central processing unit), usa ka digital camera, 1 ka video camera, usa ka router, usa ka media converter ug lain-laing mga wire nga gigamit sa pagsibya sa ilegal nga sabong nga live sa internet.

Matud ni Colonel Rommel Ochave, CPPO director, nga ilang gimonitor ang mga sabong nga posibleng nagsibya og live videos sa internet nga maoy gigamit nga basehan sa e-sabong.

“Ang ginagawa natin ngayon nag-conduct pa rin tayo ng operations against e-sabong, chine-check nga natin kung yung mga legitimate na mga cockpit arena nagagamit dyan para i-cover yung mga online sabong na yung pinalalabas ba sa mga links, mino-monitor natin. As of now, wala pa tayong nakikita bukod dyan sa San Fernando na raid, wala tayong nakikitang sabongan na ginagamit dyan sa online sabong,” matud ni Ochave.

Dugang niya, ang tanang intelligence operatives sa CPPO gipadala na aron gukdon ang mga operator sa e-sabong.

Niadtong Martes usab, nasikop sa CIDG Cebu City ug Lapu-Lapu City Field Unit ang 13 ka mga tawo nga nasakpang nagpusta og e-sabong sa haringtalpakan.com gamit ang ilang mga cellphone.

Hinuon, wa nila ibutyag ang mga ngalan sa mga suspek.

Ang 13 gipasakaan og kasong paglapas sa Section 6 sa Republic Act 10175, o ang Cybercrime Prevention Act of 2012.

Si Colonel Peter Miguel Tagtag, hepe sa CIDG Central Visayas, niingon nga ang online broadcast nga ilegal nga nag-operate, kanhi nag-operate sa e-sabong sa wala pa kini gisuspenso.

Niadtong Dominggo, Disyembre 4, si Major Kenneth Paul Albotra, hepe sa Carbon Police Station, nipahigayon og operasyon batok sa e-sabong sa Barangay Ermita, dakbayan sa Sugbo nga niresulta sa pagkasikop sa walo ka mga suspek.

Giila nga sila si Mario Ambi Mabanag, Juden Alcos Tugbong, Micheal Dingcong Ramas, John Alonso Palermo, Joel Ramas Rasonable, Cesario Eupe Palermo, Terso Baculpo Esdrilon ug Esagani Gabison Membrebem.

Samtang, si Police Regional Office Central Visayas Director Brigadier General Roderick Augustus Alba nipalanog sa mando ni Philippine National Police Chief General Rodolfo Azurin Jr.

“We shall continue our massive campaign against e-sabong and all forms of illegal gambling. I directed all units to intensify their intelligence gathering on e-sabong operations and to immediately conduct anti-illegal gambling operations,” matud ni Alba.

Dugang niya nga ila pang gisulayan ang pag-ila sa mga tawo nga nagpaluyo sa electronic nga sugal sa Central Visayas ug kini maoy ilang sunod nga gukdon.