Natuman ni World Boxing Organization (WBO) Oriental super featherweight champion John Virgel “Valiente” Vitor nga pakamangon niya ang iyang labing unang challenger nga si Korean Dong Kwan Lee sulod lang sa lima ka rounds ug iyaha kining nahimo sa mas impresibong paagi.
Kaduha gitumba ni Vitor si Lee sa iyang pagposte og 2nd round knockout nga kadaugan sa main event sa “Kumong Bol-anon 8” boxing promotion niadtong Huwebes sa gabii, Disyembre 8, 2022, sa Calape Coliseum sa Calape, Bohol.
Unang gitumba sa lumad nga taga Tagbilaran City ang bisitang challenger pinaagi sa iyang tuo nga kumo sa hinapos nga bahin sa 2nd round.
Nakabangon pa si Lee ug nakasukol gihapon og saktong binukbokay apan natikangkang kini pagbalik dihang antimano siyang naigo sa left hook ni Vitor sa ika-2:58 minutos sa 2nd round ug ning higayuna, giundang na ni international referee Atty. Danrex Tapdasan ang away.
“Mao to ako giingon nga once makakita ko og opening nga kaya nako tumbahon, wa na nako gidugay mintras nakasulod na ko,” matod ni Vitor.
Si Vitor nisaka sa 20-2, 13 KOs nga rekord samtang si Lee natikangkang sa 16-3-2, 7KOs nga baraha.
HINOG NA ALANG SA WORLD TITLE
Ang nagdumala ni Vitor nga si PMI Bohol Boxing Promotions head Floriezyl Echavez Podot nipadayag sa iyang dakong kalipay ug pagdayeg sa iyang batos.
Nagkanayon si Podot nga sa iyang tan-aw, andam na kaayo si Vitor nga mohamag alang sa world title.
“Kon makuha nato ang world title next year, mas maayo. Mo-request ta ana para ni Vitor kay mura’g hinog na kaayo,” matod ni Podot.
“Mao gyud to ang among prediction within five rounds kon mosagol ang Koreano. Unya nisagol man gyud, tagak hinuon siya.”
Gipasabot ni Podot nga kon dili nila makuha ang world title fight, punteryahon nila ang world title eliminator bout.
“Pero at least masulod na man ni siya sa world ranking,” dugang ni Podot.
Sa co-main event, ang laing boksidor sa PMI nga si Daniel Nicolas niagi pa og grabeng binukbokay una niya nalupig si Jestine Tesoro sa Davao del Sur pinaagi sa split decision aron angkunon ang bakanteng WBO Youth featherweight title.
Napilde si Nicolas sa scorecard ni judge Tapdasan, 77-74, apan nidaog siya sa laing duha ka judges nga sila si Edward Ligas, 77-75, ug Raffy Osumo, 77-75.
Sa ikawalo ug katapusang round sa grabeng binukbokay nga away, diriyot na gyud natumba ug nagbaragbarag na si Nicolas ug maayo na lang kay nakatiwas pa siya sa round.
“Puso na lang talaga ang nagdala sa akin,” matod ni Nicolas.
Sa undercard, ningdaog sila si Jhunriel Castino sa PMI batok Emmanuel Mogawa sa Dipolog City (UD), Shane Gentalan sa PMI batok Ronald Ewican sa Tangub City (TKO 3), John Vincent Pangga sa Cagayan de Oro City batok Ruel Julian sa Bukidnon (TKO 1), Rodel Suganob sa PMI batok Mark Antaran (TKO 4).
Ningdaog sab sila si Christian Balunan sa Consolacion, Cebu batok Jay-R Tulinan sa Bukidnon (UD), Gerwin Asilo sa PMI batok Kier Espere sa Surigao City (UD), Reymart Tagacanao sa Carcar City batok Jerry Tabago sa Koronadal (TKO 1), Rjay Siose sa Mandaue City batok Daver Barlas sa South Cotabato (UD), Pablito Balidio sa PMI batok Ernesto Camiguing sa Agusan de Sur (TKO 5) ug Arnel Tinampay sa Ubay, Bohol batok Ryan Maano sa Tuburan, Cebu (TKO 4).