Human sa blood works ug makuting pagtuon sa akong doktor, akong nahibaw-an nga di diay sa among kadugo o kaliwat nakuha ang akong breast cancer kundi sa akong kanhing lifestyle nga tumang ka stress ug mga ginadiling pagkaon .
Mao ni rason kon nganong akong gitutukan sa akong lindog karon mahitungod sa mga pagkaon ug binuhatan nga makapa-samot sa cancer sa lawas.
Matod sa American Cancer Society, dul-an sa 2 milyones ka mga bag-ong kaso sa nangasakit og cancer ang natala kada tuig sa America.
Kining mosunod maoy nakapasamot sa pagpataas sa risgo:
Processed foods/meat. Apil ini ang mga hotdog, sausages, bacon, ham, tocino ug uban nga gi smoke, cure, salted, canned o gipauga kay taas kini og nitrates ug preservatives para mosamot ka lami ang lasa ug dugay madaot.
Sunod ang mga pagkaong pagod o overcooked. Kini nga mga pagkaon (kasagaran karne) sama sa mga sunog nga parti sa barbecue dunay carcinogen nga makapasamot pagdaghan sa cancer cells.
Ilimnong makahubog. Ang kanunay o kada adlaw nga pag-inom ini makahatag og taas nga tsansa nga magka cancer sa baba, tila-ok, tutunlan, atay, tina-i apil sampot. Ang alcohol inig sulod sa lawas mahimong toxic chemical nga gitawag og acetaldehyde nga maoy maka-paspas sa tsansa nga magka- esophageal cancer.
Salt-cured o pickled nga pagkaon nga gilukop sa asin sama sa ginamos o buwad. Kini hinungdan nga kusog misaka ang gidaghanon sa nangasakit og stomach cancer tungod sa kaparat.
Apil sa ubang risgo ang subra katambok kay dako kini og mahatag nga kadaot ug kausaban sa lawas labi na kay daghan og kamay ug carbohydrates ang lawas.
Ang deritso ug kanunay nga pagka-igo sa init sa adlaw (radiation) makaingon sab sa skin cancer busa palandong ug ayaw pagpainit sa haring adlaw gikan alas 10 sa buntag hangtod alas 4 sa hapon.
Undangi na sab ang panigarilyo kay kini maoy numero unong mopatay sa atong baga. Gani, 9 kada 10 ka mga gipang cancer sa lungs ang nangamatay tungod sa panigarilyo.