Vallena: No sharing sa road?

Vallena: No sharing sa road?

Gipistahan sa mga motorista ang usa ka video footage sa dashcam sa usa ka sakyanan nga nagpakita sa usa ka grupo sa mga siklista dinhi sa Sugbo nga nagpatunga sa karsada. Bisan kon sila nasayod nga dunay nagdulong nga mga sakyanan, wa sila mopadaplin.

Kadto nga talan-awon di kadto talagsaon tungod kay di ra sab kadtong grupoha naghimo, naay pipila nga ing ana ang batasan. Mao pay masuko kon badlungon kay as if, ilaha ang karsada.

Sa katuigan nga nagsige pa ko og sikad, nakasugat na ko og mga tawo nga sama ani nila. Hangtod karon, naa gihapon ni ug ingon sa nanaghan pa.

Apan in behalf sa biking community, daghan pa kaayo ming nagtamod sa share the road campaign. Kon nagtuo ang mga motorista nga mayoriya sa mga nag bike hawod sa karsada, pipila lang ni sila ka pudyot sa bagang duot sa mga nagbiseklita.

Kadaghanan sa mga nagbiseklita nagtamod sa balaud sa trapiko, nagpadaplin aron ang ubang mga sakyanan makaagi nga hapsay sa karsada.

Apan daghan sab sa mga nag drive og motorized vehicles ang way respeto sa mga nagbiseklita.

BAWOS LANG?

Hayan, ang huna-huna sa uban sab nga mga siklista: tan-awon nato kon kamo sab ang di namo paagion og tarong sa karsada. Unsa kaha ang inyong bation?Mao tingali ni nga di sab sila magpadaplin.

Apan di baya sab na mao kay kon tugbangan ang kayo og laing kayo, sunog ang resulta. Kagubot sa karsada ang resulta. Kuyaw nga mosangko pa sa duguong hitabo, sama sa ubang road rage nga mga insidente nga dunay namatay kay dunay party nga namusil.

Moangkon ko nga usahay ing ana sab ko, masuko tungod kay duna man gyuy mga tawo nga di maantigong maghuna-huna nga ang ilang aksyon kuyaw.

Kadaghanan sa akong encounters naa sa mga nagmotorsiklo ra sab sama nako. Kana ganing mosikit og maayo ug kanang mokalit lang og sakdap nga maigking ka na lang tungod sa kakalit.

Apan sa mga siklista magpailob ko og maayo, labina sa mga nag bike to work. Di gani ko mobusina but akong agdon ang speed aron di mapugos og paspas.

Sagad sa sipat nga mga nagbiseklita kaning mga batan-on.

SHARE THE ROAD

Bitaw, sayon ra kaayo litukon ning share the road apan tinud-anay, kinabag-an sa drivers mag-ilog sa karsada. Ang tanan ingon sa nagdali nga mopasamot na hinuon sa kahuot sa trapiko.

Nahisama na anang pultahan nga gamay, kon magkagubot ug dunay sunog, daghan ang wa maluwas sa sulod kay wa nakagawas kay nag-ilugay sa pag-agi. Tungod man gud ni sa grabe ra sab nga paghuna-huna sa kaugalingon, nga way pagtan-aw sa uban.

Basta maluwas lang, bahala nang uban. Basta makauna lang, bahala nang ubang mga motorista.

Unta, kon mayoriya maghatagay og agianan, makuhaan tingali ang kalbaryo sa atoang mga motorista nga nag-antos na sa huot nga dan. Segurado kong makuhaan ang kalbaryo sa kinabag-an sa mga motorista.

Related Stories

No stories found.
SunStar Publishing Inc.
www.sunstar.com.ph