NANGUNA sa mga nigradwar sa pagkasundalo ang kanhi sakop sa New People's Army (NPA) sa gipahigayong graduation ceremony sa Sgt. Demerin Granstand sa Camp General Manuel T. Yan Senior, Barangay Tuburan, Mawab alas 2:00 sa hapon, Disyembre 10, 2022.
Nigradwar mao si Private Kurt Russel O. Sosa, nailanag alyas Ugnay ug kanhi deputy secretary sa napuhag nga sub-Regional Committee 4 ug secretary sa Guerilla Front 3.
Gibutyag nga human nakompleto ang Candidate Soldier Course (CSC) Cross- Trained, uban sa Infantry Orientation Course (Infoc), si Sosa usa na ka full-pledged member sa Philippine Army, ubos sa 10th Infantry "Agila" Division.
Dugang gibutyag nga si Private Sosa maoy class president sa 107 ka mga nigradwar nga gilangkuban sa 89 ka mga lalaki ug 18 ka babaye nga ang tanan nahisakop sa CSC "Katalas" Class of 741-2022 ug Infoc Class 26-2022.
Kauban nga nigradwar ni Sosa, ang laing tulo ka mga kanhi rebelde ug siyam ka mga Indigenous Peoples (IPs).
Samtang gipahalipayan ni 10ID Commander Major General Nolasco A. Mempin dili lang ang mga nigradwar apan apil na sab ang tagsa-tagsa nila ka mga minahal sa kinabuhi tungod sa suporta ug pagsabot nga gihatag, ilabi na sa panahon sa training.
Apil nga mitambong sa seremonya mao si Governor "Dorothy" Dot-dot" Gonzaga kinsa nipaabot sa iyang pahalipay ug pasalamat ngadto sa mga nigradwar.
Makita sa dagway sa mga ginikanan nga misaksi sa gradwasyon ang di matukib nga kalipay human nasud-ong ang ilang mga anak nga subli na sab nga makauban human sa unom ka bulan nga wa igkita tungod sa ilang training.