Ang Cebu City Government nigahin og P800 milyunes alang sa pagtukod og bag-ong city hall sa South Road Properties (SRP) karong 2023.
Si Bise Mayor Raymond Alvin Garcia nitug-an sa SunStar Cebu sa Lunes, Disyembre 12, 2022, nga bukas usab ang City Government sa posibilidad nga adunay kompetisyon aron madeterminar ang labing maayong architectural design alang sa bag-ong city hall.
Mokabat sa P400 milyunes ang budget sa bag-ong executive building, samtang laing P400 milyunes ang gigahin alang sa bag-ong legislative building.
“I will request the mayor and ako sad, mo-form mi og committee as to the design of the new executive and legislative building nga atoang sugdan og tukod next year,” matud ni Garcia.
Dugang ni Garcia, ang kasamtangang edipisyo sa city hall himuong Cebu City Museum aron mapreserbar ang kultura ug kabilin sa mga Sugbuanon.
Si Mayor Michael Rama bag-o lang usab niingon nga ang gisugyot nga museyo susama sa Smithsonian Institute sa Estados Unidos sa Amerika.
Sa bag-ohay lang nga interbyu, si Cebu City Planning and Development Office head Joseph Michael “Yumi” Espina niingon nga pito ka ektarya nga propiyedad sa SRP ang gitumbok nga posibleng mahimutangan sa bag-ong city hall.
Si Espina, usa ka architect, niingon nga gawas nga naa ang mga departamento ug mga dibisyon sa Siyudad, ang gisugyot nga city hall magsilbi usab nga complex sa ubang mga ahensya sa nasudnong kagamhanan. (IRT)