Di mominos 2 milyunes ka mga tawo ang gibana-bana sa lokal nga Kagamhanan sa Siyudad sa Sugbo nga mosaksi sa Sinulog Festival 2023 nga ipahigayon sa South Road Properties (SRP).
Kini ang gibutyag ni Cebu City Councilor Phillip Zafra, chairman sa public order and safety sa Cebu City Council ug pangu sa executive committee sa Sinulog Foundation Inc..
Ang kapistahan ipahigayon karong Enero 15, 2023.
“We are anticipating nga dili mominos 2 milyunes ka mga tawo ang motambong considering that this is the comeback of our Sinulog Festival after the two-year absence because of the pandemic,” padayag ni Zafra.
Ang bag-ong venue sa Sinulog Festival nahimutang sa 300 ektarya nga luna sa SRP.
Si Zafra, kinsa maoy gitudlo ni Mayor Michael Rama isip chairman sa executive committee (ExeCom) sa Sinulog Foundation Inc., nagkanayon nga di mominos 3,000 ka mga sakop sa Philippine National Police (PNP), Armed Forces of the Philippines (AFP), wa pay labot sa force multipliers, ang ipakatap sa Cebu City Government aron pagsiguro nga hapsay ug luwas ang umaabot nga mga kalihukan sa kapistahan.
Ang Cebu City Government pinaagi sa Cebu City Transportation Office (CCTO) nga gipangulohan ni Raquel Bohol-Arce, mosirado sa Cebu South Coastal Road (CSCR) nga naglagbas sa SRP gikan sa SM Seaside City ug utlanan sa Talisay.
Gumikan niini, ang chairman sa Execom niawhag sa buhatan ni Arce nga makig-alayon sa mga traffic czar sa kasikbit nga mga local government unit aron aduna silay hiniusa nga traffic plan inig abot sa selebrasyon.
Ang CCTO giawhag sa paghimo og traffic advisory ug ilang ibutang sa matag LGU gikan sa Talisay paingon sa Sibonga sa south, Mandaue paingon sa Danao para sa north, apil na ang Lapu-Lapu City ug Cordova, aron ang mga tag-iya og sakyanan nga way importanteng tuyo dili na moagi sa SRP o dili na moari dinhi sa dakbayan.
Apan gipadayag ni Zafra nga padayon gihapon nga maagian ang Cebu-Cordova Link Expressway (CCLEX).
Ang mga sakyanan adto moagi sa dalan Vestil paingon sa Barangay Mambaling ug vice versa.
Matud ni Zafra nga adunay dili mominos 20 ka mga contingent ang mosalmot sa Sinulog Festival, mayoriya gikan sa dakbayan ug lalawigan sa Sugbo.
Sa naandan, dunay float ug puppeteers category nga mosubay sa 4.5 kilometros nga rota.
Ang Cebu City mopatuman usab og usa ka adlaw nga liquor ban ug ilibkas lang human sa mga kalihukan sa Sinulog Festival.
Giangkon sa chairman sa Execom nga nag-atubang sab sila og kalisdanan sanglit bag-o ang venue, init ang lugar gumikan sa kakuwang sa mga kahoy.
Apan iyang gipadayag nga gipangitaan na nila kini og solusyon apil na ang pagbutang og public toilet nga ginama sa mga container van. (PAC)