ANG Davao City Disaster Risk Reduction Management Office (CDRRMO) niadtong Lunes nagsugod sa ilang lima ka adlaw (Disyembre 12-16) landslide incidence contingency planning ug emergency response workshop sa Grand Men Seng Hotel.
Ang workshop nagtumong sa pag-andam sa mga emergency responders sa siyudad ug sa ilang tagsa-tagsa ka mga buhatan sa panahon sa pagdahili sa yuta pinaagi sa pagtabang kanila sa paghimo sa ilang kaugalingong contingency plans, nga sa katapusan magsilbi nga ilang giya atol sa maong mga emergency scenario.
Usa ka team sa duha ngadto sa tulo ka emergency responders gikan sa City Health Office, City Social Welfare and Development Office, City Engineer's Office, City Agriculturist's Office, City Environment and Natural Resources Office, City Veterinarian's Office, Davao City Police Office, City Planning and Development Office, City Mayor's Office, Bureau of Fire Protection, ug ang Philippine Red Cross miapil sa workshop.
Ang matag team gihangyo sa paghimo sa ilang contingency plan sa usa ka insidente sa pagdahili sa yuta.
“They have to make plans before, during, and after the landslide,” ingon ni CDRRMO chief Alfredo Baloran, sa interview sa City Information Office niadtong Lunes.
Ang mga guest lecturers gikan sa DRRM offices sa ubang local government units, nakakuha sa ilang kahanas gikan sa first-hand experiences sa landslide incidents.
Si Baloran miingon nga tungod kay ang Davao City nakasinati og localized thunderstorms, pag-uyog sa yuta, dakong pag-ulan sa panahon sa La Niña, inubanan sa bukiron nga topograpiya sa siyudad, ang landslide contingency planning workshop giisip nga dinalian ug gikinahanglan.
“Importante gyud ni siya kaayo kay there are some areas in Davao City that are very prone to landslides so kinahanglan gyud nato nga makahimo ta og contingency plans para mao na siya atoang guide during disasters, especially landslides," ingon sa opisyal. (Jeepy P. Compio/CIO)