Pirma na lang ni Presidente Ferdinand “Bongbong” Marcos Jr. ang kuwang aron hingpit nang makabaton og Philippine citizenship ang resident American import sa Brgy. Ginebra Gin Kings nga si Justine Brownlee.
Kini human hiniusang giaprubahan sa Senado ang ikatulo ug final reading sa House Bill 6624 nga wala’y bisan gamayng giusab sa bersyon nga gihan-ay sa Kongreso.
Wala’y bisan usa ka senador ang nisupak o ni-abstain niini.
“The Senate approved House Bill 6224, without amendments, paving the way for the transmittal of the measure to the President for signing,” pamahayag ni Senador Sonny Angara nga napatik sa www.gmanews.tv.
Ning maong kalambuan, hayag na ang poruhan nga makaduwa si Brownlee sa Gilas Pilipinas sa ikaunom ug final window sa FIBA World Cup Asian qualifiers nga ipahigayon karong Pebrero, 2023.
Matod ni Angara, kinsa mao sab ang tsirman sa Samahang Basketbol ng Pilipinas (SBP), si Bronwlee maoy mohulip sa puwesto ni Utah Jazz Fil-Am star Jordan Clarkson, kinsa dili makaduwa sa Gilas ning higayuna tungod sa iyang obligasyon sa National Basketball Association (NBA).