Mga duwa karon:
3:00 pm- San Miguel batok Bay Area
5:45 pm- Ginebra batok Magnolia
Sugdan sa San Miguel Beermen ug Bay Area Dragons ang gikahinaman nilang best-of-five semi-finals series sa Philippine Basketball Association (PBA) Commissioner’s Cup karong alas 3:00 sa hapon, Disyembre 14, 2022, sa Philsports Arena.
Ang Dragons, nga maoy No. 1 team human sa elimination round, makonsiderar nga inilog ning sangkaa gumikan kay ilaha dayong nadispatsar ang No. 8 Rain or Shine Elasto Painters sa quarter-finals nga naghatag kanila og taas nga pahuway.
Samtang ang No. 5 Beermen ning-agi pa og duha ka mga duwa una nila nataktak ang No. 4 Converge FiberXers sa quarter-finals.
Gawas niini, gipanglampornas sab sa Dragons ang Beermen, 113-87, sa bugtong nilang panagsangka sa elimination round niadtong Oktubre 16.
Apan niadtong higayuna, wala pa nakabalik pagduwa ang duha ka mga pambato sa Beermen nga sila si June Mar Fajardo ug Terrence Romeo.
Nasayod si Dragons coach Brian Goorjian niini.
“This is not the same San Miguel team that we saw in the regular season with (Terrence) Romeo in the team now, the big fellow (June Mar Fajardo) back and their overall depth,” matod ni Goorjan nga napatik sa www.pba.ph.
“It’s gonna be a real challenge for us.”
Sa ilang pagbalik, si Romeo nag-average og 17.5 puntos samtang si Fajardo nag-average og 18.5 puntos ug 15.5 rebounds sulod sa duha ka mga duwa.
Sa main game, laing kulbahinam nga aksyon ang gilaumang masaksihan sa panagsangka sa Brgy. Ginebra Gin Kings ug Magnolia Chicken Timplados Hotshots sa pagsugod sa kaugalingon nilang semi-finals series.