Duwa karon:Nov. 15, 2022
5:15 pm- UV batok UC (Game 2 College Finals)
Labnihon na’g suway sa University of the Visayas (UV) Green Lancers ang kampyunato sa college division sa ilang pagpakigharong og balik sa University of Cebu (UC) Webmasters sa Game 2 sa finals series karong hapon, Disyembre 15, 2022, sa Cebu Schools Athletic Foundation Inc. (CESAFI) basketball sa Cebu Coliseum.
Ang Green Lancers ni coach Gary Cortes puno sa dakong pagsalig ning sangkaa human sa ilang hingpit nga dominasyon sa Game 1 sa best-of-three series, 90-62, niadtong Disyembre 11.
Hinuon, ang upat ka mga adlaw nga pahuway nakahatag sa Webmasters ni coach Kern Sesante og igong panahon aron makaplano og dakong adjustment alang sa ilang tinguha nga mainat ang series sa deciding game.
Sa panagsangka sa duha ka mga kampo sa elimination round niadtong Nobiyembre 5, ang Webmasters nakahatag og saktong kombati una sila napukan sa Green Lancers, 76-71.
Sa laing bahin, nadepensaan sa high school defending champion Sacred Heart School-Ateneo de Cebu (SHS-AdC) Magis Eagles ang ilang titulo human nila giusban paglampaso ang City of Bogo Science and Arts Academy (CBSAA) Trailblazers, 81-60, niadtong Disyembre 13 human ang best-of-three series sulod sa duha lang ka mga duwa.
Sama sa nahitabo sa Game 1, kontrolado sa Magis Eagles ang kombati hangtod na sa katapusang gutlo.
Ning sangkaa, niabot og 30 puntos ang labing dakong labaw sa Magis Eagles.
Nangapili sa Mythical Five mao sila si Jared Bahay ug Jelomar Rota sa Magis Eagles, Dale Otero ug Jerome Arboiz sa Trail Blazers lakip na si Mark Solonia sa University of Cebu (UC) Baby Webmasters.