Kapitolyo mokiha sa DPWH 7 sa kalangay sa UN Ave. project

Gov. Gwendolyn Garcia
Gov. Gwendolyn Garcia

Ang Kagamhanan sa Lalawigan sa Sugbo mopasaka og kaso batok sa Department of Public Works and Highways (DPWH) 7 ug ipa-persona non grata ang mga opisyal nga mapamatud-an nga nalambigit sa kalangay sa mga proyekto sa Sugbo.

Gikatakda ang pagpasaka sa kasong graft and corrupt practices act sa sunod semana.

Gawas sa kaso, gikatakda usab niyang ipa persona non grata ang mga opisyal sa DPWH nga masakpan nga may kalabutan sa kalangay sa mga proyekto sa Sugbo, ilabi na sa nag ung-ong nga hisgutanan sa wa gihapon mahuman nga UN Avenue sa dakbayan sa Mandaue.

Kini maoy gipahibalo ni Cebu Governor Gwendolyn Garcia atol sa pakighinabi sa mga tigbalita sa Disyembre 14, 2022.

Atol sa press conference, gisaysay sa legal consultants ug officer sa Kapitolyo ang basehanan sa pagpasaka og kasong kriminal ug administratiba batok sa DPWH.

Naglakip na niini ang pagtuo sa Kapitolyo nga gikinahanglan nga mahuman ang proyekto bisan pa sa legal nga kasungian sa kontraktor nga BM Marketing tali sa DPWH tungod sa akusasyon sa giingong pagkalambigit sa kontraktor sa pagpameke sa records ug ubang mga dokumento sa nakompleto nga mga proyekto niini.

Apan subay sa gihimong pagsusi nila ni Atty. Rory John Sepulveda, Atty. Bret Monsanto ug Atty. Donato Villa sa mga dokumento, nihatag na og legal advice ang solicitor general sa DPWH nga ipadayon ang proyekto.

“That is why we were quite surprised when we found out all of these and mind you we found out all of these not easily because, the oral representations made by DPWH is contrary to this. They were always claiming that no, it was terminated. The solicitor general advised us that it has been terminated, we cannot continue...,” butyag ni Sepulveda sa Disyembre 14, 2022.

Sa milabay nga reports, gihatagan og kasulbaran ni Garcia ang wala matapos nga trabaho sa nahisgutang lugar sanglit nakita niya nga nakahasol kini sa mga motorista ug turista nga gikan sa Mactan Cebu International Airport (MCIA) nga mopadulong sa dakbayan sa Sugbo ug ubang bahin sa probinsiya sa Sugbo.

Gipasabot ni Garcia nga sobra na ang kahasol nga resulta sa kalangay sa pagtrabaho sa proyekto ug nakahatag og dili maayong impresyon sa mga turista tungod sa abog kon init ug lapok kon mag-uwan.

“As governor of this province of Cebu, I will take legal action against all those responsible for this continuing imposition upon the Cebuano public causing untold inconvenience, misery, a black mark on Cebu’s image, an economic negative consequences,” matud ni Garcia.

“Subsequently let us study the personalities involved who have done the most damage to the Cebuanos and proceed with declaring them persona non grata here in our One Cebu island. I will request Cebu City Mayor Mike Rama, Lapu-Lapu City Mayor Ahong Chan and Mandaue City Mayor Jonas Cortes to give us as well the projects that have been abandoned by the DPWH so that these will further strengthen our position that the persons responsible shall be declared persona non grata,” dugang niya.

Tungod niini, mopasaka og kaso ang Kapitolyo batok sa DPWH may kalabutan sa graft and corrupt practices ug uban pang mga tulubagon sa publiko.

Sa Nobiyembre, unang nitanyag ang Kapitolyo sa pagpaaspalto sa 100 ka metros sa wala matapos nga junction road. Apan gisuspenso kini sa Kapitolyo tungod kay wala magkasabot ang duha ka mga habig.

Sa kasamtangan, ang DPWH nga maoy motrabaho sa maong dalan subay sa ilang pahibawo nga nakakita na sila og pundo.

Si DPWH 7 Planning and Design Division Chief Engr. Nonato Paylado niingon niadtong Disyembre 6, 2022 nga ang ilang central office nigahin og P13 milyunes alang sa pag-ayo sa gubaong dalan.

Trending

No stories found.

Just in

No stories found.

Branded Content

No stories found.
logo
SunStar Publishing Inc.
www.sunstar.com.ph