Bag-ong gitudlo nga undersecretary sa Office of the Presidential Assistant for the Visayas (Opav), Terence Calatrava, nagkanayon nga mosuroy ug maminaw siya sa mga problema sa 16 ka mga probinsya sa tulo ka mga rehiyon sa Visayas isip alter-ego ni Presidente Ferdinand Marcos Jr.
“I will provide them with the listening ear para mahibawo ta sa ilang mga concerns, ” matud ni Calatrava sa pakighinabi sa mga sakop sa media sa Miyerkules, Disyembre 14, 2022.
Si Calatrava maoy nihulip kang kanhi kalihim Michael Dino sa administrasyon ni kanhi Presidente Rodrigo Duterte.
Giangkon sa bag-ong pangulo sa Opav nga daghang nahimo ang liderato ni Dino ug iyang paningkamotan nga malabwan pa ang serbisyo sa kanhi administrasyon.
Gipadayag ni Calatrava nga ilang suportahan kon unsay mga programa ug proyekto nga himuon aron pagpalambo sa local government units (LGUs), sama sa Singapore-like Cebu City ni Mayor Michael Rama sanglit makaayo kini sa katawhan.
Gipaneguro usab niya nga moabot sa grassroots level ang mga programa ug proyekto nga ipadagayday sa Opav ilawom sa administrasyon ni Marcos.
Si Calatrava maoy regional director sa Tingog Partylist. Ang iyang asawa igsuon ni Representative Yedda Romualdez nga asawa usab ni House Speaker Martin Romualdez, kinsa paryente sa Presidente.
“The President chooses his own people based on merits,” dugang ni Calatrava, kinsa usa sab ka negusyante.
Iyang gipadayag nga ang lima ka tuig nga serbisyo sa Tingog Partylist maoy magsilbe niyang giya sa mas lapad pa nga panerbisyo.
Siya gikatakdang makighimamat og una nilang Gobernador Gwendolyn Garcia, Cebu City Mayor Michael Rama, Mandaue City Mayor Jonas Cortes ug Lapu-Lapu City Mayor Junard Chan.