Nasakmit sa University of the Visayas (UV) Green Lancers ang kampyunato human sa ilang munasginhawang overtime nga kadaugan batok sa University of Cebu (UC) Webmasters, 79-74, sa Game 2 sa finals best-of-three series sa Cebu Schools Athletic Foundation Inc. (CESAFI) basketball college division kagabii, Disyembre 15, 2022, sa Cebu Coliseum.
Sukwahi sa nahitabo sa Game 1 diin hingpit nga dominasyon ang ilang nahimo, 90-62, ang Green Lancers daw ninglugsot sa lungag sa dagom una nila naangkon ang ilang ika-14 nga korona gikan sa pagsugod sa torneyo niadtong 2001.
Alang ni Green Lancers coach Gary Cortes, mao kini ang labing bililhon sa upat niya ka mga kampyunato nga nakuha gikan sa iyang paggunit sa Green Lancers pipila na ka mga tuig ang nakalabay.
“This is the most precious championship for me in Cesafi kay grabe ang kapait nga among naagian this season,” matod sa naghilak nga si Cortes dihang gikahinabi sa sports media human sa duwa.
Gipasabot ni Cortes nga aduna siya’y pasalig sa UV management nga kon mahatod niya pagbalik ang Green Lancers sa kampyunato, hayan moluwat na siya sa iyang katungdanan.
“I don’t know what will happen next,” batbat ni Cortes.
Ang Green Lancers kanunay nga naggukod sa kulbahinam nga panagsangka human sila nabiyaan og 10-1 sa sinugdanan.
Naseguro lang sa Green Lancers ang kadaugan dihang napasulod ni Ivo Salarda ang iyang duha ka freethrows sa nahabiling 2.1 segundos nga maoy naghatag kanila og 79-74 nga labaw nga mao na ang nahimong final score.
Puntos matag usa:
UV (79) - Saga 18, Tarrosa 14, Salarda 10, Maglasang 9, Amistoso 8, Cabellon 6, Sacayan 6, Robles 4, Toliman 4, Alsola 2,
UC (74)- Galinato 13, Diaz 12, Paraldo 9, Gabisan 8, Pacaña 6, Ecal 6, Leonardo 4, Quimodo 4, Nalos 3, Dinglasan 3.