Sugdan ni kanhi world champion Filipino Jerwin Ancajas ang iyang kampanya sa bantamweight division pinaagi sa pagpakigbatok kang Thai Songsaeng Phoyaem karong Pebrero 12, 2023 sa Imus City, Cavite.
Mahitabo kini upat ka mga buwan human naputol ang dugay nga paggunit ni Ancajas sa International Boxing Federation (IBF) junior bantamweight belt, nga nailog ni Argentine Fernando Martinez.
Human sa iyang kapildihan ni Martinez, nakadesisyon si Ancajas nga mosaka na og timbang tungod kay maglisod na siya pagkuha sa 115-pound weight limit.
“Yung sinabi ni coach, hindi na epektibo ang lakas sa 115. ‘Yung condition ko sir, 100 pa kahit 12 round maganda pa suntok ko. ‘Yung hangin ko, nandoon pa. Pero ‘yung lakas ko, wala,” matod ni Ancajas nga napatik sa www.abs-cbnnews.com.
Nagkanayon si Ancajas nga naghinamhinam siya sa umaabot niyang away tungod kay dugay na sab siyang wala nakapakita og aksyon sa Pilipinas.
Katapusang niaway si Ancajas sa Pilipinas niadto pang 2016 sa Taguig City dihang nadaog niya ang IBF junior bantamweight title gikan ni Puerto Rican McJoe Arroyo.
“Isa ‘yan sa nagpapa-excite sa akin,” batbat ni Ancajas.
Si Ancajas, 30, naggunit og 33-3-2, 22KOs nga rekord samtang si Songsaeng, 23, adunay 19-3, 13KOs nga baraha.