Aduna na’y kontra si kanhi Inernational Boxing Federation (IBF) light flyweight champion Milan Melindo sa iyang pagbalik og away sa Sugbo.
Ang gitawag og “El Metodico” makigharong kang Thai Chaiwat Buatkrathok aron ilugan ang bakanteng Oriental and Pacific Boxing Federation (OPBF) silver featherweight title karong Enero 11, 2023 sa Cebu City Sports Complex.
Mao kini ang main event sa ikaduhang promosyon sa Prime Stags Sports (PSS) Fight Series nga giulohan og Prime Fight Two, nga tipik sa kasaulogan sa Sinulog Festival.
Ang PSS Boxing Promotions, nga maoy bag-ong nagdumala ni Melindo, nakigtambayayong sa Cebu City government ug Philippine Boxing Alliance alang sa pagpasiugda ning maong promosyon.
Si Melindo, 34, gilaumang makasugat og malisod nga tahas batok kang Chaiwat, 30, kinsa aduna na say taas nga kasinatian.
Naghupot si Melindo og 38-5, 14KOs nga rekord samtang si Chaiwat adunay 38-7, 25KOs nga baraha.
Aduna na say kontra ang pambatong boksidor sa PSS nga si Kit Ceron Garces, kinsa makigharong ni Neli James Maquinlan sa Compostela Valley sa top supporting bout.
Aduna pa’y laing walo ka mga away ang nakahan-ay sa undercard sa promosyon.