Wa nako damha nga mapili ko isip ‘Employee of the Month” sa kompaniya nga kasamtangan nakong gitrabahoan dinhi sa langyaw nga nasod maong karong adlawa akong tukion ang mga maayong pamatasan sa trabahoan nga dako og matabang para tunhay, hapsay ang dagan , taas ang produksiyon ug malampusan ang tumong sa kompaniya.
Unsa ma ning ‘workplace etiquette?
Kini ang mga maayong pamatasan ug paagi sa pakigrelsyon sa mga kauban sa trabahoan o customer lakip ang insaktong panamit ug sinultihan.
Una ang dako og tingog nga halos tanan sa palibot makadungog. Bastos nga kinaiya kon tinuyo ang pagpadako ug lanog sa tingog kon makig-estorya labi na sa telepono unya personal pa gayod ang gihisgutan, kay gawas nga alingogngog, maka irita ug disturbo sab kini sa ubang nagdiniyos og trabaho nga nanginahanglan og kahilom.
Apil ini ang mga sonata ug salida sa telepono. Angay ipadaplin, ipa- vibrate o i-mute ba lang una ang telepono o gadget kon naa sa trabahoan.
Limiti ang personal nga pagkukabildo sa mga kauban. Hinumdumi gibayran ka sa imong oras sa pagpanrabaho, dili sa pakigtsismis. Mahimo hinuon kining buhaton panahon sa breaktime o tingkaon.
Palayo sa mga kauban nga tabian o tsismosa kay mao ni mobira hinuon nimo paubos o mopahinay sa trabaho. Kon naay magsegi og duol kay magpatudlo, estoryahi imong labaw para siya maoy mangita og paagi sa pagtabang.
Ayaw pagsegi og reklamo (sweldo, gidaghanon sa trabaho, dinad-an sa amo ug ubang empleyado). Kon di ka kontento o malipayon, balhin o pangita na lang og laing trabaho kay mao ni ‘root of all evil’ sa trabahoan.
Di sab maayo magpa-gwapa o manudlay atubangan sa kadaghanan. Ngil-ad sab tan-awon kon masubrahan sa make-up nga mura na og munyika o ba kaha paggamit og isog nga pomada o pahumot apil ang subra kamubo nga saya o huot nga sinena.
Panahon sa tingkaon, ayaw panghilabot sa balon sa uban gawas kon giagda ka unya ayaw kalimot paglimpiyo sa kinan-an para sa sunod nga mogamit.