Bisan kon nameligro na sa pagkataktak ang defending champion San Miguel Beer sa PBA Commisioner’s Cup batok sa mas inilog nga Bay Area Dragons, wala pa gihapon sila mawagtangi og paglaom.
Presko pa sa panumdoman sa Beermen squad ang ilang malampuson nga kampanya batok sa Alaska Aces, unom katuig na ang nakalabay diin ilang naumol ang “Beer-acle” dihang sila nalubong sa 0-3 sa best-of-seven finals.
Si Chris Ross, kinsa maoy nahimong finals MVP sa maong tuig, nagkanayon nga aduna pa silay tsansa apan aron kini mahitabo, kinahanglan silang maghiusa ug makatutok sa usa ka butang nga mao ang pag-abot sa PBA Finals.
“We just got to get back to playing the ball we’ve been playing,” matod ni Ross sa interbyu sa spin.ph.
Sila ang nag-inusara nga team sa PBA nga nakabangon sa 0-3 sa Finals.
“We’ve been putting our energy in the wrong places, and we need to focus on the things that we need to do,” dugang ni Ross sa samang interbyu.
Ang import sa Dragons nga si Andrew Nicholson maoy naghuramentado sa game 2 diin siya nibahog og 34 puntos ug 16 ka rebounds aron giyahan ang iyang team batok sa Beermen, 114-95 sa Philsports Arena.
Ang 19 puntos nga kadaugan sa Dragons nahitabo human ilang gipukan sa game 1 ang team ni six-time PBA MVP June Mar Fajardo 103-102 diin ang bisita nga team gikan sa Hongkong nibangon gikan sa 16 puntos nga pagkalubong.
Apan taliwa niini, si Ross adunay positibo nga panlantaw ug kaya nilang pildehon ang top seed team.
“More than anything else, it shows that we can beat them. We pretty much dominated them the whole game for 44 minutes, although we ended up losing but that should give us the confidence that we can really beat them,” dugang ni Ross.
Ang veteran point guard sa SMB nagkanayon nga usa ka lig-on nga team ang Dragons sama sa ilang team ug nagkinahanglan sila og hiniusa nga aksyon aron ilang mapukan ug madepensahan ang ilang kampyonato.
Sa laing semis match, nagtabla ang Barangay Ginebra ug Magnolia Timplados 1-1 sa best-of-five series human napasulod ni Paul Lee ang iyang buzzer beater 96-95 sa ilang game 2.
Ang import sa Ginebra nga si Justin Brownlee kinsa maoy nagdepensa kang Lee nakadayeg sa combo guard nga nipasulod sa iyang lima ka mga tira sa tres gikan sa walo ka mga itsa.
“Clutch player. He just made a clutch play and made the shot that gave them the win,” padayag ni Brownlee.
Ang game 3 sa SMB ug Dragons sugdan karong alas 4:30 sa hapon samtang mosunod usab ang Magnolia ug Ginebra sa alas 6:45 sa gabii sa Philsport Arena. (PAC)