Vallena: Nganong daghan madisgrasya?

Vallena: Nganong daghan madisgrasya?

Basta mag-angat na gani ang Pasko, naandan ang paghuot sa trapiko ug pagnihit sa mga sakyanang pampubliko, labina sa rush hours. Nihit ang mga PUJ ug taxi. To the rescue ang mga habalhabal. But pamahalay sab sa presyo ug kalay-on sa dad-on nga pasahero.

Mao ni ang akong kasinatian niadtong Biyernes, Marso 16, dihang naglisod ko og sakay human ko nipalit og gift alang sa among party. Napugos kog sakay og habalhabal.

Kaning tigmotor ta, naanad na kog sakaysakay. Ang di ko anad kanang molusot na ko og kal-ang sa mga sakyanan nga sama ka og nag-agi og lungag sa dagom. Nakurat ko dihang ang drayber nisuot sa naglinyang mga sakyanan. Wa ko gatuong masulod mi sa kagamay sa kal-ang sa mga sakyanan.

Bisan gani nag mountain bike ko, wa gani ko nisuway sa pagsuot sa naglumbay nga mga sakyanan.

Makuyawan kong makaigo og sakyanan, side mirror o bisan sa lawas kay di baya barato ang bayranan niana. But na shock ko sa drayber. Nakalusot ra man sab mi. Basta kon nakagaras pa mi, di akoy mobayad kay wa ko nisugo sa iyaha sa pagsuot.

MADISGRASYA

Ang kakompyansa sa mga tigmotorsiklo maoy hinungdan sa kadaghan sa mga aksidente nga naglambigit sa motorsiklo. Kana bang naanad na sa paglusot bisan sa gagmay nga mga gintang sa mga sakyanan.

Sa gamay lang gud nga pagkasabod ug paglubag sa manubela sa laing mga sakyanan, makaigo ka na. Ang nakapait sa sakyanang duha ang ligid, maigo o makaigo, matumba ug posibleng maangol pa.

Kana bitawng mga nagbiseklita sa weekend, daghan man kaayo na, but maihap lang ang maaksidente. Kini tungod kay mas nagmatngon ang mga biker nga maigo o makaigo, gawas lang sa pipila.

Gawas pa, slow moving ang biseklita busa dunay time sa paglihay o paghunong.

Ang nakapait pa ra ba kay mahug lang og manablahay ang nagmotorsiklo.

Sa akoang bahin, ang akong giampo kanunay nga di akoy madasmagan ug di ko makadasmag, labina tawo. Mao ni ang labing kuyaw ug labing pait nga kasinatian sa usa ka drayber. Apan dunay mga tawo nga way konsensya, mosibat pa human nakaigo. Di atubangon ang responsibilidad.

AYAW OG UNDANG

Kon nagsugod ka na og biseklita, mas maayo nga sa imong tibuok kinabuhi mosakay ka og biseklita at least three times a week, usa ka oras ang kadugayon.

Usa nako ka higala nga doktor nibaud nako nga kon moundang ko sa pagpasingot, labina sa pag bike, daghan ang motumaw nga mga sakit. Tinuod, di maayo ang resulta sa akoang annual physical exam. Ingon pa sa doktor nga duna na koy type 2 diabetes but wa kaayo ko motuo. Hinuon, slow ang healing sa akong samad kon masamad ko. But lately nga nag ready ko og balik sa pag bike, okay na.

Nag-eczema sab ko sa miaging tuig nga grabe kaayo. Nag insomnia ko to the point nga makatulog ko og usa ngadto sa duha ka mga oras na lang.

Pait kaayo kadto nga kasinatian unya dako pa og gasto tungod sa kamahal sa mga tambal ug bayad kada bisita sa doktor. Hayan ang inadlaw nga exercise ug uban pa dako unta kaayo og factor aron makalikay sa di maayong epekto sa kakuwang sa ehersisyo.

Ang gitumar nga tambal sulod sa dugay nga panahon di pa maayo og epekto sa panglawas.

Busa, ayaw undang og sikad. Biking is the best form of exercise. Makalaaglaag ka na, nakapasingot pa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph