Sayo sa gabii niadtong Disyembre 16, 2021, dihang nasinati sa Sugbo ang usa sa labing bangis nga bagyo nga miigo sa isla, ang Bagyong Odette.
Nagbilin kini sa usa sa labing progresibong isla sa nasud nga walay kuryente, nihit nga suplay sa tubig, dili maayo nga network connectivity lakip na ang internet connection, ug labaw sa tanan ang pagpasira sa dagkong mga establisemento, lakip na ang gasoline stations.
Kini nga kasinatian maoy nakaaghat kang Cebu City Congressman Eduardo “Edu” Rama Jr., sa pagsang-at og balaudnon nga nag-require sa mga gasoline station sa pagbutang ug pagmintinar sa moandar nga emergency generator sets.
Ang House bill 6199 o “An Act Requiring Gasoline Stations to Install and Maintain Functioning Emergency Generator Sets and Providing Penalties for Non- Compliance thereof” nga gisang-at niadtong Nobiyembre 16, nagtinguha usab sa pagsilot sa dili motuman kon mapalabang na kini isip balaud.
“The Philippines is vulnerable to all types of natural calamities such as typhoons, earthquakes, floods, volcanic eruptions, and landslides. Their occurrences cause loss of lives and property, serious social and economic disruptions and loss of livelihoods and services, including fuel services provided by gasoline stations,” mabasa sa explanatory note ni Rama.
Gihatagan og gibug-aton sa Sugbuanong magbabalaod nga ang emergency backup power generation sa mga gasoline station makaseguro sa kapabilidad sa operasyon niini ug makapugong sa taas nga linya sa publiko tungod sa pagkawala sa kuryente.
Pipila ka adlaw human sa pagkuso-kuso sa Bagyong Odette, namatikdan ang taas nga linya sa mga sakyanan sa mga pampublikong karsada sa Sugbo aron mokuha og gasolina sa mga station.
Samtang ang Department of Energy (DOE) nipasalig sa publiko nga adunay igong suplay sa gasolina niadtong panahona, kadaghanan sa mga gasoline station gisirad-an tungod kay walay kuryente o walay generator sets nga temporaryong mopaandar sa pumping machines.
Ang Seksyon 3 sa HB 6199 nagsugyot usab og silot alang sa mga tag-iya sa gasoline stations tungod sa kapakyas sa pag-instalar ug pagmentinar sa mga emergency genset.
“Any gasoline station owner who fails to install emergency generator sets within the prescribed period shall pay a fine of not less than P100,000 but not more than P200,000 and any gasoline station owner who fails to maintain emergency generator sets shall pay a fine of not less than P50,000 but not more than P100,000.”
Ubos sa giduso nga balaudnon, ang DOE nga maoy implementing agency, adunay gahom sa pagsuspenso sa operasyon sa bisan unsang gasoline station tungod sa kapakyas sa pagtuman.
Uban sa kasamtangan nga mga kinahanglanon sa pag-operate sa usa ka gasoline station nga gitakda ubos sa Republic Act 8479 o ang Downstream Oil Deregulation Act of 1998, ang usa ka emergency genset wala iapil. (gikan sa PR)