Pelicans gisunog sa Suns

PASUNDAYAG: Si Phoenix Suns guard Devin Booker (No.1) mibungkag sa depensa sa New Orleans Pelicans atol sa ilang duwa kagahapon didto sa Phoenix. / AP Photo
PASUNDAYAG: Si Phoenix Suns guard Devin Booker (No.1) mibungkag sa depensa sa New Orleans Pelicans atol sa ilang duwa kagahapon didto sa Phoenix. / AP Photo

Mipakatap og season-high 58 puntos si Devin Booker aron pangulohan ang Phoenix Suns batok New Orleans Pelicans, 118-114, sa National Basketball Association (NBA) regular season game didto sa Phoenix, Arizona kagahapon.

Kulbahinam nga second half ang giduwa ni Booker aron aswaton ang Suns sa pagkalubong ngadto sa kadaogan batok sa ilang rival team sa Western Conference.

Gilubong ang Suns og 24 puntos sa third quarter, apan nakasikit kini gamit ang 25-6 run luyo sa 20 puntos ni Booker nga maoy nakapasikit sa duwa ngadto sa 89-84.

Padayon ang pag-init sa Phoenix sa fourth quarter ug natabla ang iskor 99-all sa nahabiling 7:04 minutos human ang free throw ni Josh Okogie.

Sa wa pa ang free throw ni Okogie, si Booker maoy solo nga miaswat sa Suns gamit ang 25 straight points gikan sa third quarter ngadto fourth quarter.

Mibida ang point guard nga si Chris Paul sa uwahing bahin human niya mapasulod ang three-pointer nga aduna nalay 64 segundos sa oras aron ilansang ang kadaogan sa Suns.

Si Paul mitapos sa duwa nga adunay 18 puntos ug walo ka assists.

Si Booker mitali sa iyang ikaduhang duwa nga adunay 50 puntos pataas karon nga season. Mihimo ang All-Star guard og 51 puntos batok Chicago Bulls niadtong Nobiyembre 30 sulod lamang sa tulo ka quarters.

Napasulod ni Booker ang 21 sa iyang 35 ka itsa, lakip na ang unom ka tres. Milabni pud kini’g lima ka rebounds samtang mitunol og lima ka assists.

Ang Suns mitali sa ilang ikatulo nga sunodsunod nga daog ug miimprob ngadto sa 18-12 (win-lose) rekord,

Si Zion Williamson nakamugna og 30 points samtang si C.J. McCollum mitunol og 27 alang sa Pelicans nga napildi sa ilang uwahing tulo ka duwa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph