Garcia: Paralan bang Dasnan ing Ginu (The Way to Reach God)

”Para karing maki-isip a makayagyag king e mayayakit,

alang pangataung arle ning Kakataskatasan, ing panyulung masulit.

Bang mika-panyulung king katunurang ita parating masulit para karing mami-katawan.

Para king ninuman a sasamban na Ku, susuku na ngan ing sablang daraptan na Kanaku

at layun makatagulaling Kanakung alang pangalili, makasuglung king kasuywang makaparikil at parating migunam-gunam Kanaku, a tintun na na ing isip na Kanaku,

O anak nang Pirta, para kaya Aku ing mabilis a talapangabus king laut

ning beytan at kamatayan.

Ituntun me ya kabud ing isip mu Kanaku, ing Kakataskatasang Pangatau

ning Punbatala, at isuglung mu ing sablang katalinwan Kanaku.

Kanita mye kang parati lub Ku, alang pamikakunu.

Makamal kung Ardyun, O talapanyambut ning pibandyan, nung e me aytuntun ing isip mu Kanakung alang pangakawani, kanita tukyan mu na la mu ring makatuntung paralan

ning yoga ning kasuywan. King paralang ayni tumubu ing kapagnasan bang dasnan mu Ku..

Nung e mu la aysane ring tuntunan ning yoga ning kasuywan,

pakikwanan mu namung gawa para Kanaku. Pauli ning kapamilatan

ning pamangawa para Kanaku miras ka king kapantas-pantasang tuntungan.”

~ Dalit ning Kakataskatasang Panginwan | Dangka 12, Sunis 5-10

(The Song of God 12: 5-10)

***

Ing Kakataskatasang Ginu bibye na ngan ing pamikatagun bang mipalapit tamung pasibayu Kaya pauli ning alang anggang lugud Na kekatamung alang panayang kapalit kambe na mu naman ning pakalulu nang alang kapara’t alang-anggaa mengaring dayat malat a alang bebe. Kekatamu namu nung buri ta’Yang lapitan, paulagan at luguran mu naman anti king pamaglugud Na kekatamu.

E ya mu king Israel o karing Udyus pepakit ing Ginu nung e karing sablang dane buryan Na. E mu king Arabia, e mu king Mecca karing awsan tamung Muslim ngeni; e mu king India nung nu ding Hindus, Jain, Buddhists Sikh at aliwa pa; e mu Sri Lanka nung e nu man karin a buryan Na at e mu inyang minunang panaun nung e pati na king kasalungsungan.

Pigkaluban na katamu ngan pamikatagun bang makasuyu layun makalapit king Ginu. Malyari tamung lumapit kaya kapamilatan ding miyayaliwang paralan—pamagayunu, pamanigaral karing Banal a Kasulatan, pamagsalbat agpang karing tuntunan ding Banal a Kasulatan, pamagdaun karing sablang daraptan tamu, pamidake karing nung nanung mayap at malyaring nabangnan o pamanyaup karing pakakalulu. Nanupata makasaup la reti bang dalise tamu pilubluban o pusu.

Ngana pin ning metung a sunis king Biblya, “Mikalam la ding dalise pusu uling akit da Ya ing Dyos”, (Mateu 5:8). E na buring sabyan nita a uling marinat tamu pusu e ta Naya malyaring akit. Ali. Ating paralan bang luminis la ring pusu tamu. Anti king sabun at danum a kaylangan tamung gamitan anting paralan king pamaglinis karing mapilang bage keti king yatu—atin mu namang malyaring ipaglinis karing pusu tamu kambe ring isip at diwa tamu.

Ing parati at alang salang pamigale, pamanunggge, pamagdalit karing Banal a Lagyu ning Ginu yang pekamayap nung e ing ya kabud a pekasaguling malyaring magpadalise karing mangarinat tamung pusu kararagli. Babating na lang tambing ning Nwan a Lagyu ding sablang mitipun a salang agawa tamu king milabas, maragul o malati man, aganaka tamu o akalingwan ta’na. Nung luminis tamu pusu—malyari ta na Yang lapitan bang makapagparalampu ta’king Ginu malambat nang manenaya kekatamu bang tanggapan king Kayang kaul a tune tamu at kabud a santungan.

Ngana pin ning Banal a Kasulatan--

”Iligtas mu ku, Ginu, kapamilatan ning Lagyu Mu.” (Dalit 69)

“Ing saup ati yu king Lagyu ning Ginu!” (Dalit 121)

***

Mipayntagun ing kapagmasusyan ding apulung Simbang Bengi king beytan da...Mapangabus at makalam a aldobeytan karing kanakung pakamalang adwang dara—Antonia Vda. De Pacia y Garcia at Rosalina Vda de Manese y Garcia, (agnan la pamo) king Duminggung ayni agya mang ati na lu king sumangid a bye. Sana pagkaluban Na lang kapayapan at pakalulu ning Ibpang Kakataskatasan.

E ta pu maynip at ala nang makasabat pa--pitung aldo namu pu—Pasku na!

***

Dake Talabaldugan:

1. mimwa (pangdiwa) mekaranas o mekarandam kamwa. English – got angry, mad or enraged, irate, irritated, irked, piqued, vexed, indignant. Alimbawa king pamangamit: “Agyang kanita ya pa mimwa ing kakaluguran kung Rading, e ne pa mu rin apibatang e sopan ing kayang mamulang a pangane anak.”

2. minabak (pangdiwa) meugtu, mengan paugtwan o mengan king ugtu o libutad ning aldo—manga alas-12 ning ugtu. English – took or had lunch, luncheon, light repast, dine at high noon. Alimbawa king pamangamit: “Inya pala e ne bisang mangan ing dalo kasi minabak ne pala keng kariyan keng kabalenan bayu pa mag-ugtu.”

***

MIKASING-KABALDUGANG at MISALUNGAT

KABALDUGANG AMANU TAMU

ibekut – pamanalan a maingat, maralas karing bingut, o maulagang bage.

kilikan – pamagdala king bingut a makasake o makasalampak king papalwan

at kaakulan ning metung a gamat at ing metung mamantabe mu.

pusanan – pamagdala king tau o kaladwan, o bage gamit ing gulut.

dalan – talanan ing nanu mang bage gamit la ring gamat o saken.

ibwat - pamanangat king tau, o nanu mang bage amgmula king lalam patas.

talanan – gamitan la ring gamat bang ating gawan king tatalnan—mekad iyalis,

itas, ibekut, o dalan.

kaulan – gamitan la ring gamat angga na king takde bang ikulung ya

o la ring aliwa—tau man o ali.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph