Kapin sa P7 milyunes nga balor sa illegal nga drugas ang nasakmit sa kapulisan sa Central Visayas atol sa usa ka adlaw nga Simultaneous Anti-Criminality and Law Enforcement Operations (Sacleo).
Nagsugod ang operation sa Sabado sa alas 12:01 sa buntag sa Disyembre 17, 2022 ug natapos sa alas 12:01 sa Dominggo sa kaadlawon sa Disyembre 18, 2022.
Sa maong operation, nakasikop ang kapulisan og 131 ka drug personalities nga niresulta sa pagkasakmit sa 1,052.52 gramos sa gituohang shabu nga dunay standard drug price nga P7,157,136 sulod sa 107 ka anti-illegal drug operations.
Samtang nakasikop usab sila og 207 ka mga sugarol ug pagkasakmit sa P18, 969 isip pusta, lakip na ang illegal gambling paraphernalia.
Nakasakmit usab sila og 132 ka nagkalainlaing matang sa dili lisensyadong armas ug usa ka eksplosibo.
Mokabat usab sa 15 ka most wanted persons ang nadakpan ug laing 78 ka wanted persons ang nasikop usab sa kapulisan.
Tungod sa maong accomplishment, gidayeg ni Police Brigadier General Roderick Augustus Alba ang iyang mga sakop dungan sa mando nga ipadayon pa ang kampanya batok sa kriminalidad aron magpabilin nga malinawon ang tibuok Central Visayas.