Manglupad ang makusog nga mga kumo sugod karong alas 6:00 sa gabii, Disyembre 21, 2022, sa pagpahigayon sa “Rumble in Naga” boxing promotion sa Enan Chiong Activity Center sa City of Naga, Cebu.
Sa main event sa promosyon, magbinukbokay sila si kanhi two-time world champion Vic “Vicous” Saludar (21-6, 11KOs) sa Polomolok, South Cotabato batok Ariston “Double A” Aton (9-5, 5KOs) sa Cagayan de Oro City.
Ning awaya, ilugan nila ni Saludar ug Aton ang bakanteng Asian Boxing Federation (ABF) minimumweight title.
Nagkanayon si Saludar nga mahinungdanon kining awaya alang kaniya gumikan kay usa kini sa mga agianan aron makapanuktok siya og balik alang sa world title.
“Paningkamotan lang gihapon nako nga mahimo nako ang maayo nga dula. Mapakita nako nga nindot ang among dula,” matod ni Saludar, kinsa kanhi tag-iya sa World Boxing Association (WBA) ug World Boxing Organization (WBO) minimumweight titles.
Hinuon giklaro ni Saludar nga dili siya makasaad og knockout nga kadaugan apan kon makakita siya og oportunidad, dili niya kini usikan.
“Dili ko mag-estorya nga ako siyang ma-knockout kay ang knockout maabot ra man na siya,’ dugang sa 32 anyos nga si Saludar.
Si Aton, kinsa manghod og dekada ni Saludar, nipadayag sab sa iyang dakong pagsalig nga molampos.
Sa supporting bouts, magsangka sila si Speedy Boy Acope batok Jhonrey Lauza Domingag, Michael Adolfo batok Anthony Galigao, Johnro Taneo batok Marlon Alejandro, Jeson Mopon batok Grant Elorza.
Mokompleto sa mga parisan mao ang tali nila ni Cherwellab Cantel batok Mark Anthony Rotilles, Jakeson Saludar batok Jimpaul Dignos, Raffie Jamero batok Joebert Dacullo, George Sedillo batok Dondi Lariosa Janonillo, ug Keir Toregosa batok Henry Flor.
Ang promosyon nga gitambayayungan pagpasiugda sa City of Naga pinangulohan ni Mayor Val Chiong, Championship Development Boxing of the Philippines, Prime Stags Sports Promotions, ug Butlig Promotions.