Mga duwa karon:
3:00 pm- Magnolia batok Ginebra
5:45 pm- San Miguel batok Bay Area
Mopakita’g aksyon karong hapon, Disyembre 21, 2022, ang Bay Area Dragons ug Brgy. Ginebra Gin Kings batok sa ilang tagsatagsa ka kontra nga adunay parehong misyon – tuldokan og suway ang duha ka best-of-five semi-finals series sa Philippine Basketball Association (PBA) Commissioner’s Cup sa Mall of Asia Arena.
Ang Gin Kings makigharong sa Magnolia Chicken Timplados Hotshots sa premirong duwa samtang ang Dragons makigbatok sa San Miguel Beermen sa main game sa Game 4 sa duha ka mga series.
Aduna na unta’y kahigayunan ang Dragons pagtuldok sa series sa Game 3 pa lang apan gibaraw sila sa Beermen, 96-98, nga maoy nakapahak sa labaw sa guest team sa series, 2-1.
Sa laing series, gihimong sumsoman sa Gin Kings ang Hotshots sa Game 3, 103-80, aron pagposte og 2-1 nga bintaha sa ilang kaugalingong series.