Kini ang paghulagway sa 58-anyos nga biyudo, nga nagpatago sa pangalang Esmael, kinsa nagbutyag nga ang suod niya nga higala ug klasmayt sa hayskol ug ang kanhi hinigugma niini nga ila ra sab nga klasmayt kaniadto, subling nagkita atol sa gipahigayong batch reunion ug Christmas Party dili pa lamang dugay.
Matud pa nga nahimong sentro sa komedya ang duruha human nasayran nga pareho silang wala’y mga kabilinggan sa kinabuhi, ang babaye nagpabiling dalaga human nga migawas pagka-madre napulo na ka tuig ang milabay, samtang ang higala ni Esmael nga gipatago sa pangalang Donato, upat ka tuig na sab nga nabiyudo human namatay sa sakit ang babayeng gipakaslan.
Sumala pa nga atol sa reunion makita sa duha ang subling pagkabanhaw sa kaniadtong mga matam-is nga panahon nga sila pareho pang nagtungha sa hayskol.
Gisulti ni Esmael nga wala’y pormal ang panagbulag sa duha sanglit, human sila migradwar sa hayskol, ang babaye gidala sa iyang ginikanan sa Manila ug didto gipa-eskwela aron mahilayo kang Donato gumikan kay wa kini kagustohi sa ginikanan sa babaye.
Giingon nga napugos lamang sa pakigminyo si Donato sa kanhi asawa human nasakitan dihang nasayran nga nag-madre ang babayeng tinud-anay nga gimahal ug gihigugma.
Sa pagsulat ning maong balita, giubanan ni Esmael, ang higala sa pag-adto sa Agusan del Sur sanglit, atoa didto nagpuyo ang babayeng gimahal sa higala sukad pa kaniadto, ang babayeng buot makauban hangtod sa kahangturan.
Dugang niini, mihangyo si Esmael nga di lang isulti ang matuod nilang mga pangalan aron sa paglikay sa kasamok o kagubot sanglit, ang mga anak ni Donato sa namatay niining asawa dili uyon nga mag-minyo o mokiringking pag-usab ang mao nilang amahan.