Hingpit na nga milingkod sa katungdanan ang bag-ong regional director sa Police Regional Office 7 nga si Police Brigadier General Jerry Bearis hulip kang Police Brigadier General Roderick Augustus Alba.
Atol sa turnover of office ceremony, gibutyag ni Bearis nga iyang ipadayon ang nasugdang mga programa ni Alba nga iyang gihulagway nga snappy police officer.
Lakip sa iyang kamanduan ngadto sa tanang police commanders ug national support unit commanders nga ipatuman ang tanang mga programa sa Philippine National Police (PNP) aron makab-ot ang malampuson nga kampanya sa pagpatuman sa kahusay ug kalinaw.
Dugang ni Bearis nga sa iyang pagdumala sa kapulisan sa Central Visayas, iyang patutukan ang internal cleansing diin kadtong mga pulis nga nalambigit sa kotong, hulidap lakip na sa illegal gambling ug illegal drugs, palagputon.
“They are not part of our team and must be immediately removed to bring back the nobility of our Philippine National Police organization,” matud ni Bearis.
Estrikto usab si Bearis sa pagdawat og payola gikan sa illegal activities sama sa sugal ug illegal nga drugas.
“I am reminding everyone of our strict no take policy of any form, material or monetary, derived especially from operators of illegal gambling, illegal drugs and other entities of devious operations or activities,” dugang ni Bearis.
Lakip sa iyang patutukan ang kampanya batok illegal nga drugas, krimen ug terorismo nga magdala og kasamok sa Central Visayas.
Samtang hugot nga gihimakak ni Alba ang nigawas nga report nga gihulipan siya sa pwesto tungod sa insidente sa pagpanulis sa usa ka pulis sa Bohol ug isyu sa e-sabong.
Iyang gipasigarbo nga ang kapulisan sa Central Visayas taas og accomplishment batok sa e-sabong itandi sa ubang mga rehiyon sa Pilipinas.
“Itong sinasabi nyong sa e-sabong. I just want to report na mataas po ang accomplishment ng PRO-7 but then again I will return to basic premise of transfer and relief is normal for us because we follow orders,” matud ni Alba.
Sa pangutana kon maapektohan ba ang pagpangandam sa PRO-7 sa siguridad sa Sinulog, matud ni Alba nga dili ra sanglit nasayod siya sa kapasidad sa mga personnel sa Cebu City Police Office (CCPO). /