Nakasulod sa finals ang Brgy. Ginebra Gin Kings human nila gipangsumsoman ang Magnolia Chicken Timplados Hotshots, 99-84, sa Game 4 nga maoy nakatiklop sa ilang best-of-five semi-finals series, 3-1, kagahapon, Disyembre 21, 2022, sa Philippine Basketball Association (PBA) Commissioner’s Cup sa Mall of Asia Arena.
Kini maoy ika-29 nga higayon nga nakasulod sa finals ang labing bantugang basketball team sa nasod.
Sa finals, ikaharong sa 14-time champion Gin Kings ang modaog sa laing semi-finals series tali sa Bay Area Dragons ug San Miguel Beermen nga padayon pang nagsangka sa Game 4 sa ilang series ning pagsuwat.
Tataw nga determinadong mohuman sa series, ang Gin Kings sayong nanginit og ningposte kini’g 29-18 nga labaw human sa 1st quarter.
Gipaburot sa Gin Kings ang ilang labaw ngadto sa 60-41 sa 3rd quarter ug ninglahos na sila paingon sa kadaugan.
Ang Gin Kings gipangulohan sa ilang resident import Justine Brownlee, kinsa nagpakatap og 24 puntos.
Nidugang og 19 puntos si Japeth Aguilar alang sa Gin Kings, ninghatag og 18 puntos si LA Tenorio samtang nitampo og 14 puntos si Scottie Thompson.
Ang Hotshots gipangulohan ni Calvin Abueva pinaagi sa iyang 14 puntos, nidugang og 18 puntos si import Nick Rakocevic samtang nitunol og 12 puntos si Jio Jalalon.