Mokabat sa 500 ka mga benepisyaryo nga giila daan nga children, families, and indigenous peoples in street situations (CFIPSS) gikan sa mga dakbayan sa Sugbo, Lapu-Lapu, Mandaue, ug Naga nakadawat sa cash assistance gikan sa Department of Social Welfare and Development (DSWD) 7.
Nikabat tanan og P3.7 milyunes nga livelihood ug educational assistance ang gipang-apud-apod sa programa nga gipahigayon sa Hoops Dome sa dakbayan sa Lapu-Lapu sa Miyerkules, Disyembre 21, 2022.
Gihimo kini atol sa paglusad sa inter-agency services ug information caravan alang sa CFIPSS sa Sugbo nga gipangunahan sa DSWD, uban sa ubang mga ahensya sa gobiyerno ug non-government organizations.
Sa maong ihap, 100 ka mga bata nga dili lumad apan nasakop sa Comprehensive Program Street Children-Beneficiaries and Profiled Street Children sa nahisgutang mga dakbayan, nakadawat og educational assistance nga nagkantidad og P5,000 matag usa, ingon man hygiene ug clothing kits.
Laing 100 ka mga indigenous peoples (IP) nga mga bata, mga Ati gikan sa City of Naga ug Bajau gikan sa Alaska Mambaling sa dakbayan sa Sugbo, nakadawat og hygiene ug clothing kits ingon man birth registration.
Gawas niini, dul-an sa 185 ka non-IP nga mga pamilya (Comprehensive Program Parents of Street Children-Beneficiaries and Parents of Profiled Street Children sa upat ka siyudad) nakadawat og P5,000 nga livelihood assistance, home-life kits ug Noche Buena package.
Ang mga ginikanan sa IP sama sa Ati nga mga bata sa City of Naga ug Bajau nga mga bata nga taga Alaska Mambaling sa Cebu City, nakadawat sab og Noche Buena package matag usa.
Sa usa ka press conference, si DSWD Central Visayas Director Shalaine Marie niingon nga kadaghanan sa mga benepisyaryo nasakop na sa ilang komprehensibo nga programa, nipasabot nga ni-hire sila og mga social worker ug mga magtutudlo alang sa profiling.
Si Lucero niingon nga ang katuyoan sa maong kalihokan mao ang pagpugong sa pagdagsang sa CFIPSS ilabi na sa panahon sa yuletide, ug midugang nga kini usa usab ka paagi sa kasamtangang administrasyon nga inisyatiba sa pagpalig-on sa proteksyon sa CFIPSS.
Matud ni Lucero nga ilang gikuha sa kadalanan ang mao nga mga tawo ug nanghinaot nga madala sila sa mas desente nga paagi sa pagkinabuhi alang sa mga Bajau ilabina sa mga street children nga dili mga IP.
Si Asec. Irene Dumlao gikan sa Office of the Assistant Secretary for the Office of the Secretary Concerns, sa iyang bahin, niingon nga ang maong aktibidad usa ka serye sa mga kalihokan nga gimugna sa DSWD, nitataw nga nagsugod sila niini pipila ka semana ang miagi sa Mindanao.
Matud usab ni Dumlao nga tuyo sa administrasyon nga matubag ang isyu sa mendicancy sa nahisgutang mga sektor nga nagpabilin sa kadalanan ug nabutang sa mga risgo.
Siya niingon nga sila usab nagpahigayon og mga konsultasyon sa mga LGU tungod kay sila hugot nga nagtuo nga kinahanglan nga makigtambayayong kanila alang sa permanente nga pagsulbad ug paghatag og solusyon sa maong partikular nga isyu.
Si Lucero niingon nga ila kining masundog sa ubang mga dapit sa Central Visayas, partikular sa Bohol, Negros Oriental, ug Siquijor. /