Naangkon sa beteranong si Vic Saludar ang bakanteng Asian Boxing Federation (ABF) minimumweight title pinaagi sa 7th round knockout nga kadaugan batok kang Ariston Aton sa main event sa “Rumble in Naga” boxing promotion niadtong Miyerkules sa gabii, Disyembre 21, 2022 sa Enan Chiong Activity Center sa City of Naga, Cebu.
Si Saludar, 32, kinsa kanhi World Boxing Association (WBA) ug World Boxing Organization (WBO) minimumweight champion, nisaka sa 22-6, 12KOs nga rekord.
Ang kadaugan gilaumang makaabli og pultahan alang sa tinguha ni Saludar nga makapanuktok og balik alang sa world title.
Si Aton, 22, natagak sa 9-6, 5KOs nga rekord.
Sa top supporting bout, nirehistro og 2nd round knockout nga kadaugan si Speedy Boy Acope batok Jhonrey Lauza.
Sa laing mga away, ningdaog sila si Michael Adolfo batok Anthony Galigao (TKO 1), Jeson Mopon batok Grant Elorza (UD), George Sedillo batok Dondi Lariosa Janonillo (UD), Cherwellab Cantel batok Mark Anthony Rotilles (MD), Joebert Dacullo batok Raffie Jamero (UD) samtang nagtabla ang sangka nila ni Johnro Taneo batok Marlon Alejandro ug Alec Bonita batok Royder Borbon.
Nahimong posible ang pagpahigayon sa promosyon sa panagtambayayong sa City of Naga government pinangulohan ni Mayor Val Chiong, Championship Development Boxing of the Philippines, Prime Stags Sports Promotions, ug Butlig Promotions.