Nimugna og 25 puntos si Malik Beasley samtang nidugang og 23 puntos si Fil-Am star Jordan Clarkson aron pangulohan ang host Utah Jazz sa pagbuntog sa Washington Wizards, 120-112, kagahapon, Disyembre 23, 2022 (PH time) sa National Basketball Association (NBA).
Ning sangkaa, niagresibo si Beasley sa ilawom nga bahin diin iyang gimugna ang kadaghanan sa iyang mga puntos sukwahi sa kasagaran nga mamupo siya og puntos sa three-point area.
“I was attacking the hole and not settling for 3s,” batbat ni Beasley. “I think there are some times where I get complacent so I got to keep attacking downhill.”
Si Lauri Markkanen nidugang og 21 puntos alang sa Jazz samtang si Collin Sexton, kinsa mao pa lang ang pagbalik gikan sa pito ka mga duwa nga pagpalta, niamot og 18 puntos sulod lang sa 17 ka mga minutos nga pagduwa.
“We knew the kind of energy he would bring and he’s going to fire up everybody else up as well,” matod ni Markkanen kabahin kang Sexton, kinsa gihatagan ra og limitadong playing time tungod sa sugyot sa doktor nga nag-atiman kaniya.
Ang Jazz ningsaka sa 19-16 nga rekord, ikapito sa Western Conference.
Ang Wizards, nga nahagbong sa 12-21 nga rekord – ika-12 sa West – gipangulohan ni Bradley Beal pinaagi sa iyang 30 puntos samtang nitunol og 21 puntos si Kyle Kuzma.
Si Beal maoy nimugna sa nag-unang 12 ka mga puntos sa Wizards sa 4th quarter apan wala kini nakapakgang sa pag-arangkada sa Jazz.
Sa usa ka talagsaong hitabo, wala’y namugna nga three-point shot si Beal.
“They were geared to get into Brad and make him play inside the line, tried to pressure his dribble,” asoy ni Washington coach Wes Unseld Jr.
Naggukod ang Jazz, 88-90, sa hinapos nga bahin sa 3rd quarter apan ning-rally kini og kalit aron pagposte og 101-90 nga labaw sa nahabiling kapin sa siyam ka mga minutos sa 4th quarter.
Wala na buhii sa Jazz ang labaw gikan niini hangtod na sa katapusang gutlo. (AP)