Taas og panglantaw si Adelaide 36ers coach CJ Bruton kabahin sa abilidad sa batan-ong Pinoy nga higante nga si Kai Sotto ug iya kining gihulagway nga sama ni Yao Ming sa China.
“Yao Ming is big in China. And Kai Sotto is the Philippines’ version of Yao Ming,” matod ni Bruton sa usa ka episode sa Unrivalled: Inside NBL23 nga napatik sa Spin.ph.
Alang ni Bruton, iyang nakumpara si Sotto kang Yao tungod sa paningkamot niini nga mahimong labing unang lumad nga Pinoy nga makaduwa sa National Basketball Association (NBA).
Si Yao nakakulit og dakong pangalan sa NBA human kini gipili sa Houston Rockets isip No.1 overall pick niadtong 2002.
Usa kini sa gihangop ni Sotto.
“In terms of representing my country, that’s been my goal ever since I started playing basketball,” matod ni Sotto.
“I watched the national team when I was really young and I just saw how they succeeded, how they inspired a lot of kids my age and how they inspired a lot of people.”
Si Sotto nagpalista sa miaging NBA draft apan wala’y nikuha sa 20 anyos ug 7’3” nga basketbolista hinungdan nga nibalik siya pagduwa sa 36ers, usa sa miyembrong teams sa National Basketball League (NBL), nga maoy professional league sa Australia.
Hinuon, dako ang pagsalig ni Bruton sa potensyal ni Sotto.
“Kai Sotto is a promising player when he puts it all together,” matod ni Bruton.
“Not everyone gets drafted, but it’s not the end of the world. He’s still learning. Kai is going to keep evolving, keep developing, and he’s going to help us get to where we need to go.”