Ang mga drainage project sa mga lugar nga grabeng bahaan sa A.S. Fortuna St., Barangay Banilad, Mandaue City gisugdan na sa local government unit (LGU).
Si Mandaue City Mayor Jonas Cortes niingon niadtong Miyerkules, Disyembre 21, 2022, nga ang mga proyekto nagtutok lamang sa pagpalapad ug pagdugang sa bag-ong outfalls sa ibabaw sa mga kasamtangan nga drainage.
Kini nga mga proyekto gisugdan niadtong Lunes, Disyembre 19, nga naglangkob sa mga dapit sa Cebu Rolling Hills Memorial Chapels Inc. ug LH Prime Medical Clinic Mandaue hangtod sa outfall sa Mahiga Creek sa Barangay Subangdaku.
Si Cortes nagkanayon nga nanghinaot sila nga ang epekto sa mga proyekto sa pagpamenos sa kanunay nga problema sa baha sa lugar masinati dayon sa sunod tuig.
Matod niya nga hugot ang ilang koordinasyon tali sa Department of Public Works and Highways (DPWH) aron moabag sa proyekto tungod sa dakong kantidad sa kuwarta nga gikinahanglan aron mahuman.
Apan si Cortes wala nibutyag kon pila ang kinatibuk-ang kantidad nga gikinahanglan sa mga proyekto.
Sa managlahing pakighinabi sa Biyernes, Disyembre 23, si manlalaban John Eddu Ibañez, executive secretary ni Cortes, niingon nga ang Siyudad nag-abaga og labing menos P26 milyunes alang sa phase one ug two sa proyekto.
Sa phase one, P11 milyunes, ug sa ikaduha, P15 milyones, matod ni Ibañez.
Matud pa ni Cortes nga nanawagan usab sila sa Nasudnong Kagamhanan sa paggahin og tukmang pundo alang sa hingpit nga kahumanan sa proyekto.
“These were supposedly nationally funded by the MCDP (Metro Cebu Development Project), but it was unfinished. So, we will convince the National Government if they could allocate enough funds so that a solution to this problem (flood) will be given,” matod ni Cortes.
Subli niyang gipasabot nga kon gusto sa Kagamhanan sa Dakbayan nga abagahon ang tanang pundo nga gikinahanglan aron mapadali ang pagpatuman sa mga proyekto, dili nila makaya nga makompromiso usab ang ubang serbisyo sa dakbayan.
Niadtong Agusto ning tuiga, ang A.S. Fortuna St., ilabina ang mga lugar nga gihisgutan alang sa proyekto, gisanapan sa taga dughan sa tawo nga kaladmon sa baha human sa kusog nga pagbunok sa ulan.
Nakapahunong kini sa dagan sa trapiko ug nagbutang og mga risgo sa panglawas ug kaluwasan sa publiko.
Si Banilad Barangay Captain Greg Yap niingon nga moapelar siya kang Cortes ug Mandaue City Lone District Rep. Emmarie “Lolypop” Ouano-Dizon aron sulbaron ang nagkagrabe nga kahimtang sa pagbaha ug maghimo og konkretong solusyon.
Sa bahin ni Dizon, si Atty. Gonzalo Malig-on, chief of staff sa kongresista, niingon nga maghuwat sila sa hangyo sa Siyudad kon magkinahanglan sila og tabang sa alang sa igahin nga pundo alang sa proyekto.
“We need to know officially to avoid duplication of the projects,” matod ni Malig-on. (HIC)