Tumang kagul-anan ang pagsugat sa usa ka pamilya sa Pasko kay ang ilang breadwinner namatay human napagan sa pinusilay sa duha ka mga gang.

Ang biktima ang usa sa tulo nga napagan sa pinusilay niadtong Huwebes sa buntag, Disyembre 22, 2022 sa dalan Mabini, Barangay Parian, dakbayan sa Sugbo.

Ang lalaking bikima naigo ang likod sa lawas apan ang bala nilapos sa kidney.

Nasuta usab sa imbestigasyon nga suyaay kalabot sa mga babaye ang hinungdan sa away sa duha ka mga grupo.

Ang namatay sulod sa Cebu City Medical Center (CCMC) sa samang adlaw giilang si Anthony Bolocon Corro, 37, taga Bonifacio St., Barangay Tejero, dakbayan sa Sugbo.

Si Corro gitumbok nga bread winner sa pamilya.

Siya dunay duha ka mga anak nga gagmay pa ug siya lang ang nagbuhi niini, sigun sa iyang asawa nga si Annie Rose.

Ang magtiayon gikan nga ningsimba sa Misa de Gallo sa Cebu Metropolitan Cathedral apan sa ilang pagpamauli, si Corro naigo sa pinusilay tali sa Marka Tabla ug Amersan Fam group.

Naigo ang biktima sa likod sa lawas apan ang bala nilahos sa kidney.

Sa dihang gidala siya sa Cebu City Medical Center (CCMC), gideklarar siya ni Dr. Paulo Chester Fabian nga patay na.

Si Police Executive Master Sergeant Vincent Aguanta, kinsa usa sa mga nangaangol, naa pa sa pribadong tambalanan samtang si Donna Blair Banzon nakagawas na human matambali ang igo sa iyang apapangig.

Matod ni Police Colonel Ireneo Dalogdog, hepe sa kapulisan sa dakbayan sa Sugbo, nga tungod kay dunay nakalas, ikiha nila ang mga suspek og murder ug frustrated murder ngadto sa korte.

“Ongoing ang atong follow up investigation while we are preparing for the filing of the criminal complaint against those involved in the shooting incident. We are now preparing for the case of murder, frustrated murder and alarm and scandal against the suspects,” matod ni Dalogdog.

NADAKPAN

Atol sa follow up operations sa Parian Police Station, ilang nadakpan ang lima ka mga sakop sa Amersan Fam group nga maoy gikaengkwentro sa Marka Tabla.

Ang mga suspek giila sa CCPO nga silang Junior Jomao-as, 18, taga Alcohol Street, Zapatera; James Batarlo, 18, taga Sitio Putat, Tejero; Anthony Revilleza, alas Nino Barro, 18, taga A. Valle, T. Padilla; Ronald Revilleza, 27, taga sitio Bukog, T. Padilla; April Boy Regala Turno, 19, taga P. del Rosario, Sambag 1.

Matod ni Police Major Efren Diaz, hepe sa Parian Police Station, nga sila ang nakita sa CCTV camera ug gitudlo usab sa mga saksi nga maoy hinungdan nga ila dayon nga gilusad ang operations.

“Because of our witnesses our continuous investigation regarding this case na identify nato ang mga suspects. Then through follow up operations sa mga suspects nakasulod ta sa group chats nila. Dakog tabang sa atong investigation kaya nakuha nato kining mga suspects,” matod ni Diaz.

Dugang ni Diaz nga human nila nasikop ang mga suspek, nakasulod sila sa group chat sa ilang gang diin ilang nabasa ang tanang conversations nga naghisgot sa insidente sa Mabini.

Ang grupo na lang sa Marka Tabla ang ilang gipangita ug duna na usab silay mga ngalan nga maoy sunod nilang target.

BABAYE DIAY

Giingong nagsugod ang engkwentro tungod lang sa suya-suya sa mga babaye, apan matod ni Diaz nga nagpadayon pa gihapon karon ang ilang imbestigasyon ug duna pa silay gipangita nga laing gun man.

“According sa investigation namo, suya-suya ra ni sa babaye ba mao na nag start ang kagulohan,” dugang ni Diaz.

Sa video sa CCTV camera, makita ang duha ka lalaki nga sakop sa Amersan Fam gang nga namusil sa mga batan-on nga nanagan sa dalan Mabini, Barangay Parian.

Giklaro hinuon ni Dalogdog nga dili pa alarming ang insidente sa gang war sa dakbayan sa Sugbo apan matod niya nga gi seryuso nila kini nga insidente tungod kay dunay kinabuhi nga nakalas.