DAKO ang kalipay sa duha ka mga topnotchers sa October 2022 Licensure Examination for Teacher (LET) nga taga Dakbayan sa Panabo, Davao del Norte.
Nasayran nga ang duha mao sila Jessiree F. Pantigan nga maoy Top 1 ug Flora May A. Briones nga mao sab ang Top 10 kinsa pulos molupyo sa siyudad sa Panabo.
Tungod niini gipaadto sa opisina sa mayor sa siyudad sa Panabo ang duha ug personal nga gitunol ngadto kanila ang ganti nga balor og tag P10,000.00 matag usa kanila ingon man ang Certificate of Recognition.
Parehong nakahuman sa University of Mindanao (UM) Panabo City ang duruha ug giingon nga ang ganti nga ilang nadawat, pag-ila kanila sa lokal nga panggamhanan sa siyudad sa garbo nga ilang nahatag.
Sumala pa nga gipasalamatan sila sa amahan sa siyudad nga si Mayor Jose E. Relampagos dungan sa ilang pagsulti nga ang ilang pasyon sa pagtudlo magpadayon sa mismong siyudad sa Panabo sa tinguha nga ang ubang mga estudyanteng mga taga siyudad sa Panabo makakat-on sa ilang kaalam.
Sa pagtunol sa maong ganti anaa usab ang presensiya sa pipila ka mga nagdumala sa nahisgutang tunghaan kinsa mapasalamaton usab sa garbo nga ilang nakab-ot.
Luyo niini, ang duruha makadawat sab og pahalipay gikan mismo sa ilang tunghaan.