Usa ka 60-anyos nga kanhi boksidor namatay human giingong dunggaba niadtong Dominggo sa alas 2 sa hapon, Disyembre 25, sa makadaghan sa iyang silingan nga iyang gikasukmagay sa Sityo Luy-a, Brgy. Lawaan 2, dakbayan sa Talisay.

Ang biktima giilang si Oscar Cañeda Baculpo, 60, nagpuyo sa dapit samtang ang suspek giilang si Macario Cañada Barliso, alyas Unggoy, 52, kinsa wa pa madakpi sa pagsuwat ning taho.

Si Carlos Alcos, 33, silingan sa duha, niingon nga niadtong Sabado, Disyembre 24, siya ug ang biktima nanguha og bas duol sa ilang gipuy-an.

Si Barliso niduol kanila bisan wa sultihi ug nitabang sa pagpanguha og bas.

Sa 10 ka mga sako, nikita sila og P300, apan si Barliso nangayo sa iyang bahin apan human masayod si Baculpo, nasuko kini ug nagkalalis ang duha.

Si Danny Dayapan, 38, laing silingan, niingon nga nag-inom sila gikan sa Sabado sa gabii hangtod sa Dominggo sa buntag.

Mga alas 8 sa buntag, sila si Baculpo ug Barliso nagkasinukmagay, diin ang suspek nalupig kay ang biktima boksidor sa dihang batan-on pa. Nakaangkon og blackeye ang suspek.

Mga alas 2 sa hapon sa samang adlaw, samtang nagluto si Baculpo, iyang nakit-an si Barliso nga nagdulong kaniya, nagdala og kusilyo.

Nagharong ang duha ug giingong gidunggab sa suspek sa makadaghan ang biktima.

Nahunong lang ang pagdunggab sa suspek human nipatunga si Dayapan. Ang suspek daling nisibat.

Si Baculpo gidali sa pagdala sa tambalanan apan patay nang niabot.