Kapin sa 600 ka mga pulis ipakatap sa rota sa Walk with Jesus nga bahinon sa lima ka mga sector atol sa opening salvo sa mga kalihukan sa Sinulog sa Enero 5, 2023.
Sa Lunes, Disyembre 26, 2022, gipatawag sa Cebu City Police Office ang mga assistant sector commander gikan sa Mandaue City Police Office, Lapu-Lapu ug Cebu Police Provincial Office alang sa final nga security briefing nga ipatuman atol sa opening salvo.
Usa niini mao ang pagdili sa pagdala og backpack niadtong buot mosalmot sa kalihukan.
Matud ni Police Lieutenant Colonel Janette Rafter, deputy city director for operations sa CCPO, nga gibahin nila sa lima ka mga sector ang paghatag sa siguridad aron dili magkatibulaag ang paghatag sa kamandoan.
Atol sa maong adlaw, ilang ipakatap ang kapin sa 600 ka mga police personnel, wala pay labot niini ang force multipliers gikan sa nagkadaiyang mga barangay sa siyudad.
Magsugod ang Walk with Jesus sa alas 3:00 sa kaadlawon nga manukad sa Fuente Osmeña rotunda paingon sa Basilica Minore del Santo Nino.
“Gi-brief na nato sila as to their respective areas of supervision, kay gi divide man nato ang whole route sa Walk with Jesus from Fuente Osmeña going to Basilica Minore del Santo Niño. So that malimit nato ang span of control and supervision kay sumala sa mga nangagi, ubay-ubay gyud ang mga tawo ani. Kon dili nato i-divide og sectors, magkaguliyang ang atong mga pulis,” pagpasabot ni Rafter.
Samang security plan ilang ipatuman sa Walk with Mary nga manukad sa Archdiocesan Shrine of our Lady of Guadalupe sa Brgy. Guadalupe nga mosubay sa V. Rama ug moliko sa B. Rodriguez dayon subay sa Osmeña Boulevard.
Gipanglantawan nga modugok ang daghang deboto sa maong adlaw nga mosobra pa sa gidaghanon sa nangaging kalihukan sa Sinulog, busa angay pangandaman, sigun ni Rafter.
GIDILI
Dunay mga idili ang kapulisan sa adlaw sa prosesyon, sama sa dili pagdala og backpack tungod kay makabalda.
Awhag ni Rafter sa publiko nga labing maayo nga dili magdala og backpack aron dili malangay ang pagsugod sa prosesyon.
“As much as possible dili gyud magdala og mga ingun ana nga mga butang para free flow ang atong mga aktibidadis. Dili na ta mag check tungod kay open baya ang atong area,” dugang ni Rafter.
Wala pa hinuon makadawat og hulga sa siguridad ang kapulisan.
Apan bisan pa niini nagpadayon ang ilang pakig-alayon sa intelligence community aron masiguro nga luwas ug hapsay ang pagsaulog sa Sinulog.