Mosuway pagposte og 2-0 nga bintaha ang Brgy. Ginebra Gin Kings sa ilang pagpakigbatok og balik sa Bay Area Dragons karong alas 5:45 sa hapon, Disyembre 28, 2022, sa Game 2 sa Philippine Basketball Association (PBA) Commissioner’s Cup championship series sa Smart Araneta Coliseum.
Human sa ilang 81-96 nga kapildihan sa Game 1 sa best-of-seven nga engkuwentro, ang Dragons ningpadayag nga aduna sila’y adjustments nga pagahimuon.
Kon unsa man kini, ang Gin Kings andam moharong niini.
“Siguradong mas mahirap ang Game 2,” matod sa pambatong pointguard sa Gin Kings nga si LA Tenorio nga napatik sa www.pba.ph.
Sa nag-unang duha ka mga duwa sa duha ka mga kampo lakip na sa elimination round, ang Dragons mao ang nagkontrolar sa 1st half apan ningbawi ang Gin Kings sa 2nd half deretso paingon sa kadaugan.
Labing seguro, naleksyon na ang Dragons ning puntoha kabahin sa ilang pagpakigharong sa labing bantugang basketball team sa Pilipinas.
“The ball is on our court to make adjustments,” matod ni Dragons coach Brian Goorjian.
Matod ni Goorjian nga kinahanglan nilang malimitahan ang resident import sa Gin Kings nga si Justin Bronwlee ug sa samang higayon, kinahanglan nilang matabangan ang ilang import nga si Andrew Nicholson nga makalingkawas sa pilit nga depensa sa Gin Kings.
“Over the course of the game, what stood out was we got to do something on Brownlee,” matod ni Goorjian kabahin sa ilang duwa sa Game 1.