Gianunsyo sa World Boxing Organization (WBO) World Championship Committee nga ilahang gitudlo si undisputed bantamweight champion Japanese Naoya “Monster” Inoue isip WBO “Super Champion.”
Ang pag-anunsyo nahitabo paglabay sa pipila ka mga semana human sa 11th round knockout nga kadaugan ni Inoue batok kang Paul Butler sa ilang unification bout alang sa dungog isip undisputed champion sa bantamweight division.
Ning maong kadaugan, nailog ni Inoue ang World Boxing Organization (WBO) bantamweight title ni Butler aron idugang sa gipanag-iya niyang World Boxing Association (WBA), World Boxing Council (WBC) ug International Boxing Federation (IBF) bantamweight titles.
Si Inoue, kinsa adunay 24-0, 21KOs nga rekord, maoy labing unang hapon nga boksidor nga nahimong undisputed champion.
Human sa iyang dominasyon sa bantamweight, nagplano na si Inoue nga dad-on niya ang iyang kabangis sa super bantamweight.