Kadagkuan sa Archdiocese of Cebu namahayag nga wa silay nakitang dautan sa nag-viral nga video niadtong pari uban sa iyang mga sakristan nga nisayaw atubangan sa altar sa simbahan sa Sto. Tomas de Villanueva Parish, Danao City, Cebu atol sa ika-walo ka adlaw sa Misa de Gallo.
Ang tigpamaba sa Archdiocese nga si Monsignor Joseph Tan nagkanayon nga ang maong insidente dili maisip nga immoral, apan dili kalikayan nga adunay mga wa nakauyon sa gihimo sa maong pari.
Giklaro ni Tan nga ang pari (identity kasamtangang gipugngan) uban sa iyang mga sakristan nihimo sa maong pasundayag nga tapos na ang misa.
“His intentions was to spread some holiday cheers but not all find that proper. He was not dancing to desecrate the altar willfully,” tipik sa pamahayag sa monsignor.
Apan matud pa ni Tan nga mas bintaha kon gihubo sa pari ang iyang sotana atol sa iyang performance.
Way silot nga ipahamtang ngadto sa pari sa iyang gihimo, apan wa magpasabot nga giagni ang ubang relihiyusong sektor nga sundon ang maong pagsayaw sud sa simbahan.
VIRAL VIDEO
Ang maong kontrobersiyal nga video diin gisayaw ang sikat nga Vietnamese nga awit nga ‘Ting Ting Tang Ting’ nga gi-share sa SunStar Cebu’ Facebook page kagahapon, Disyembre 27, sa 6:25pm nga miani og 445 ka comments, 131 shares ug 1,300 reactions.
Madungog sa kuha sa video nga adunay nalingaw samtang adunay mga mikomento nga nakasaway sa gihimo sa maong pari.
Adunay netizen nagkanayon nga sagrado ang simbahan ug dili angay yaga-yagaan.
Samtang adunay misuporta sa maong pari nga miingon nga igo lang mihatag og ‘good vibes’ si Father ilabi na sa adlaw sa Pasko.
Gani, adunay midayeg tungod kay maayo mosayaw ang maong pari diin ang iyang mga sakristan nagsilbing back-up dancers.