GIKALIPAY og dako sa 69 ka mga tawo kinsa mga benepisyaryo nga makadawat sa mga food packs nga hinatag gikan sa lokal nga panggamhanan sa lungsod sa Montevista ubos sa pamunoan ni Mayor Cyrex Basalo, RN.

Matud pa nga ang maong 69 ka mga tawo nahimong mga biktima sa baha gumikan sa sagunsong pag-ulan sukad pa niadtong adlaw sa Pasko.

Gibutyag nga ang maong mga benepisyaryo gikan sa tulo ka mga Purok sa Barangay Dauman, 25 ang gikan sa Purok 1, anaa sa 40 sa Purok 2 ug upat gikan sa Purok 4.

Mapasalamaton ang maong mga residente gumikan sa hinanaling aksyon nga gihimo sa LGU-Montevista sanglit, ang mga maong food packs dako kaayo’g ikatabang sa inadlaw nilang pagkaon.

Ning kasamtangan padayon pang nasinati dili lamang sa maong lungsod ang tinaginting nga pag-ulan, kundi sa tibook probinsiya, hinuon wa pa’y gikatahong mga bakwit gikan sa onse ka mga lungsod.

Padayon ang pag-monitor sa probinsiyal nga panggamhanan sa posibleng pagtaas sa tubig sa mga kasapaan ning probinsiya.