Milanat og napulo ka minutos ang engkwentro tali sa mga sakop sa 47th Infantry Battalion sa Philippine Army ug mga rebeldeng New People’s Army (NPA) sa sitio Bajong, Barangay Baunos, bukirang dapit sa lungsod sa San Isidro, lalawigan sa Bohol alas 10 sa Miyerkules sa buntag, Disyembre 28, 2022.
Giingong nakadawat og tawag gikan sa nagpakabana nga residente ang mga sundalo labot sa presensya sa gibana-banang 10 ka gikatahapang mga NPA sa dapit nga nilusad og “extortion activities.”
Dali nga ningresponde ang mga sundalo nga niresulta dayon sa pinusilay.
Matud ni Army Lieutenant Colonel Allyson Depayso, commanding officer sa 47th IB, nga walay naangol o nakalas sa habig sa gobyerno apan gisubay pa nila kon duna bay naigo sa mga rebelde.
Nakuha sa mga personnel sa 47th IB sa dapit ang mga bala sa kalibre .45 nga pistola, bala sa AK-47 rifle, magazine sa kalibre .45 nga pistola, mga tolda, medical paraphernalia, food packs, personal nga mga gamit ug subersibong mga dokumento.
“As part of our ongoing efforts to put an end to the local communist armed conflict and stop their recovery efforts in Bohol Island, the residents’ willingness to assist the soldiers by providing noteworthy information on the whereabouts and activities of these NPA terrorists is extremely helpful,” matud ni Depayso.
Pasalig ni Depayso nga ang mga sundalo nga naa sa lalawigan sa Bohol magpadayon sa pagpakigbatok sa mga rebeldeng komunista aron magmalungtaron ang kalinaw sa probinsya.