Nasikop sa mga sakop sa Cebu City Mobile Force Company sa Cebu City Police Office uban sa Getafe Municipal police station ang usa ka mananagat nga nabutang sa no. 1 most wanted person provincial level human nalutsan og warrant of arrest sa kasong pagpanglugos ug laing duha ka mga kaso sa Putok 1, Barangay Pandanon, lungsod sa Getafe, Bohol.
Ang ngan sa 54 anyos nga mananagat nga akusado gipugngan ning mantalaan kay kabanay ang giingong iyang biktima. Ang kapulisan armado og warrant of arrest sa mga kasong pagpanglugos, child abuse ug lascivious conduct nga giluwatan ni Branch 6 Presiding Judge Ester Morales Veloso sa Regional Trial Court (RTC) sa dakbayan sa Sugbo.
Dunay gitugot nga piyansa ang korte nga mobalor og P180,000 sa kasong lascivious conduct, P200,000 sa kasong rape through sexual assault apan walay piyansa sa laing duha ka mga ihap sa kasong pagpanglugos ubos sa Article 266-A sa Revised Penal Code.
Matud ni Police Lieutenant Colonel Dexter Calacar, Mobile Force commander, nga human nila nadawat ang kopya sa warrant of arrest, ila dayon kini nga gi serve sa pakig-alayon sa municipal police station sa Getafe alas 3:50 sa Miyerkules sa hapon, Disyembre 28, 2022.
Kabanay sa akusado ang giingong gipahimuslan sa dugay nga panahon apan human gikiha, nitago kini og pila ka buwan.
Nadakpan na usab kaniadto ang akusado sa mga sakop sa Carbon Police Station sa kasong sa ilegal nga drugas atol sa gilusad nga One Time, Big Time operation niadtong Enero 27, 2017 sa dalan Garfield, Barangay Suba apan nabuhian pagka Pebrero 10, 2017 human nakapiyansa.