Binghay: Pinoy: World Class nga Mamumuo

Binghay: Pinoy: World Class nga Mamumuo

Dakong garbo nakong nahimamat ug nahinabi ang pinakataas nga opisyal sa higanting barko nga Norwegian Cruise Line sa among pagsuroysuroy og bisita sa mga lainlaing isla sa Bahamas ug Caribbean Islands.

Pagkahibalo sa Turkish General Manager Kivanc Ucar, nga Pilipino ko, nagpunay na lang hinuon kini og tabi ug pagdayeg sa mga Pinoy nga iyang mga tripolante kay subra 80% sa iyang mga kawani mga Pinoy man unya dunay ubang ginagmay nga nasagol nga mga Thai, Indians ug Indonesians.

Puno ni Ucar, di siya ganahan mo hire sa ubang langyaw, gawas sa Pinoy, kay lagi mga reklamador, way pailob, demanding labi na sa sweldo ug way gugma sa trabaho.

Kitang mga Pinoy nabantog na sa tibuok kalibutan nga mga world class nga mga mamumuo, di lang sa mga cruise ships, kundi bisag land based nga trabaho.

Kining mosunod ang mga hiyas maoy nakapaangat nato sa natad sa pagpanrabaho:

Kitang mga Pinoy makasabot ug mahibalo mo eningles bisag naay accent. Dako kini og ikatabang labi na kon manrabaho sa langyaw.

Gawas ini, atong ibuhos atong talento, kusog, kasingkasing ug huna-huna sa atong trabaho.

‘Filipinos love their work and have strong work ethics. They always put their best efforts and go extra-mile to do their work with a smile’ puno ni Ucar.

Loyal sab kuno kaayo kitang mga Pinoy sa atong pamilya. Wa gyod ko molalis ini pagsulti niya kay tinuod man nga atong pamilya maoy atong inspirasyon ug sentro sa kinabuhi para maabot ang mga tinguha ug makaangat.

Naila sab ta sa atong taas nga pasensya ug pag-antos bisan og binuwang malayo sa pamilya.

Bisag asa ko molingi sulod sa barko tuay Pinoy nga malipayong nag-alagad sa mga customer kay maayo man sab tang mo abi-abi sa mga bisita.

Gawas ini, daghan ta og talent (sayaw, kanta, suwat, manguha og hulagway og kukabildo). Gani, wa ko magdahom nga ang naggunit sa ikaduhang pinakadako nga position nga Assistant Cruise Director, Pinoy sab.

Akong pagyukbo sa mga OFWs ug mga tripolanting Pinoy.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph